Асосий мавзулар
6 май 2019

Ғайримиллий ташаббусга расмий муносабат қачон эълон қилинади?

Россиянинг сиёсий малайлари иштирокида ташкил этилган ташаббусга Ўзбекистондаги сиёсий ҳукумат бирор сиёсий баҳо бераётгани йўқ.

“Озодлик”нинг ёзишича, рус тилига расмий тил мақомини бериш ташаббуси “Россотрудничество” федерал агентлиги молиявий кўмаги асосида фаолият юритадиган Тошкентдаги рус маданият марказининг 25 йиллигига бағишланган тантанада муҳокама қилинган.

Демак, тахмин қилиш мумкинки, Россия ҳукумати ўзбекистонлик “рус тили жонкуярлари” орқали президент Шавкат Мирзиёевнинг қўлига лакмус қоғози тутқазишган. Аслида бу унинг учун бир синов вазифасини ўташи керак назаримизда.

Чунки президент очиқчасига бу ташаббусни рад этса, Россияга қарши боришдек таассурот уйғотиши мумкин. Уни қўллаб-қувватлаш эса ўз халқига маъқул келмайди ва унинг обрўсига жиддий зиён етказади.

Балки шунинг учундир президент мазкур ташаббус борасида ўз фикрини билдириши учун бир қанча имконият бўлса-да, ҳеч қандай баёнот бермаётир. Жумладан, Россия ташқи ишлар вазири Сергей Лавров билан Тошкентдаги учрашув ва Сурхондарёга сафар ана шундай имкониятлар эди.

Бунинг устига, Ўзбекистон президентининг матбуот котиби ҳам йўқ унинг фикрларини оммага етказадиган. Энди президентнинг матбуот котиби йўқлиги алоҳида масала.

Лекин сиёсий масалаларда ҳушёрлик кўрсатаётган Шавкат Мирзиёев лакмус қоғозини игнор қилишни маъқул кўраётганга ўхшаяпти.

Ўрисларнинг “Юпитерга рухсат этилган нарсага буқа учун ижозат йўқ”, деб қўполроқ таржима қилса бўладиган мақоли бор.

Шавкат Мирзиёев ўриспарастларнинг жамиятимизда бўрон кўтарган ташаббусига сукут билан жавоб қайтараётган бир пайтда Владимир Путин ўзининг украиналикларга соддалаштирилган фуқаролик бериш қарори юзасидан тинимсиз баёнотлар беришдан чарчамади. Имкон топилган ерда шу ҳақда гапирди.

Хуллас, англашилдики, рус тилига расмий мақом бериш ташаббуси сиёсий масаладир. Шундай экан, Ташқи ишлар вазирлигимиз баёнот билан чиқиши керак эди.

Гарчи “Ўзбекистон24” телеканалига интервью бераётганда ўзбекча гапириб, қолган барча учрашувларда ўрисча нутқ ирод қиладиган ташқи ишлар вазири Абдулазиз Комиловдан ўзбек тилини ҳимоя қилиб баёнот беришини кутиш мантиқсиз.

Бу ёқда ўтган ҳафтада мамлакат Сенати қоп-қоп қонунлар қабул қилиш учун йиғилди. Лекин зиёнкор “зиёли”ларимизнинг томдан тараша бўлиб тушган ташаббусига Сенат бирорта махсус баёнот бағишлашни лозим топмади.

Кўз тегмасин, гарчи ҳукумат оғзига мум тишлаб ўтирган бўлса-да, айрим вазирлар ўзларининг бу борадаги шахсий фикрларини баён этишмоқда. Йўқдан кўра бу ҳам ижобий ҳолатдир.

Энг асосийси, ўзбек жамиятининг мутлақ катта қисми ўриспараст ватандошларимизнинг шармандали ташаббусига қарши оёққа турди.

Лекин агар ҳукуматнинг расмий муносабати бўлмас экан, ҳали бу қаршилик етарлича сиёсий қудратга эриша олмайди.

Қолаверса, жамиятимиз анчайин оғмачи. Агар, худо кўрсатмасин, юқоридан ишора бўлса, бу қудрат ўриспарастларнинг фойдасига ўзгариши ҳам ҳеч гап эмас.

Шунинг учун бугун ўзбек жамияти ғайримиллий ташаббус юзасидан энг юқори доираларнинг муносабати қандайлигини билишга ҳақли.

Сардор Азим
Eltuz.com

Тағин ўқинг
25 декабр 2017
Президентнинг парламентга мурожаатини таҳлил қилганда, у шу вақтгача сарой ичи ва атрофида кечган ҳокимият ўйинлари ҳақида тўлиқроқ тасаввурга эга ...
23 ноябр 2015
Бугун, 22 ноябр соат 10 да, Швед шаҳри Эстерсундда 1978 йилда туғилган Ўзбекистон фуқароси Юрий Жуковский устидан суд бошланди. ...
16 декабр 2015
Улуғбек Ашур Eltuz.com Таниқли хонанда Юлдуз Усмонова 12 декабр куни ўз таваллуд кунида президент Ислом Каримовга бағишлаб қўшиқ яратгани ...
30 январ 2019
Швециядаги «Экспрессен» интернет нашри 28 январь куни мамлакатдан Ўзбекистонга депорт қилинаётган навбатдаги ўзбек оиласи ҳақидаги мақолани чоп қилди. Ғаффоровлар ...
Блоглар
21 апрел 2024
Картинани кеча уйимга олиб келдим. Бир кеча термилиб ётмоқчи эдим. Лекин имкон бўлмади. Доимгидек ҳаёт ...
6 апрел 2024
Бугунги кунда рус пропагандаси фақат рус телеканаллари орқали бериляпти деган одам қаттиқ янглишади, чунки пропаганда ...
28 март 2024
Россия гумондорларини қийнагани ИШИД версиясини йўққа чиқармайди.  Бу ерда бир эски сийқа трюк ишлатилади. Спецслужбада бу ...