Асосий мавзулар
1 июл 2019

Сўконғич ҳоким коррупция ҳақида нималарни айтди?

Шу кунларда Андижон вилояти ҳокими Шуҳрат Абдураҳмоновнинг республика даражасидаги раҳбарлардан тортиб маҳаллий амалдорларгача шалтағини чиқариб сўккани можароси ОАВлару ижтимоий тармоқларгача шов-шов бўляпти. 

Ҳамманинг оғзида битта гап: “Ҳоким президент тайинлаган вазирларни сўкди”, “Унинг оғзи шалоқ”, “Маҳаллийчилик қиляпти”, “У ўзи ўйлаётганидек ҳокимият таянчи ҳам эмас, президент таянчи ҳам эмас”.

Биз бу гаплардан сал узоғроқда турган ҳолда ҳокимнинг ўша йиғилишдаги сўкинишларини четлаб ўтиб, эътиборингизни у тилга олган улкан коррупция масалаларига қаратишни лозим топдик. 

Зеро, республика ва маҳаллий даражадаги коррупция иллатларига оид бу гаплар эътибордан четда қолиши керак эмас. 

Чунки ҳамма ҳокимнинг сўконғичлигини биринчи планга чиқариб, аслида халқ маблағларининг совурилишини эсдан чиқараётгандек кўринади. 

Биринчи мисол шаҳар ҳокими Дилмурод Раҳматуллаев фаолиятига оид. Бу одам ҳам сўконғичликда Шуҳрат Абдураҳмоновдан ҳеч ҳам кам эмас. 

Вилоят ҳокими уни шаҳар учун ажратилган 48 та чиқинди ташиш машинасининг 16 тасинигина тегишли мақсадлар учун ишлатиб, қолганини шағал ташишга чиқариб юборганлиги учун сўкяпти

Шаҳар ҳокими бу машиналарга шағал ташитяпти, шаҳар эса чиқиндига тўлиқ бормоқда.  

Шуҳрат Абдураҳмонов шаҳардаги Нодирабегим истироҳат боғидаги қурилиш ишларига оид яна бир коррупция фактини келтирганки, суммани эшитган одам ёқа ушлайди. 

Ҳокимнинг гапига қараганда, Миллий банк бу қурилиш учун ўтказган пулнинг 400 минг доллари ҳали иш бошланмасданоқ ўғирланган. Еб қўйганлар эса энди “ёниб турган қозондан” чиқиш ҳаракатини қилиб ётибди. 

Бу пулни ўмарганлар, англашилишича, илгари Тошкентдаги паркларни ҳам “жаннат” қилиб юборган. 

Савол туғилади, ҳали иш бошланмасданоқ шунча пулни туя қилганлар Тошкентда “жаннат” барпо этаётганда томоғига тиқин тиқиб ўтирганми? 

Ҳоким тилга олган навбатдаги муаммо мамлакат тиббиёт тизимидаги коррупция ҳолатларига тегишлидир. 

“Тошкентдаги битта и***с бир ердан импорт қилиб олиб келяпти шприцни. Унинг тепасида 15-20 фоиздан ҳаммаси ўтирибди. Уларнинг ризқи қирқилди-да энди”, дейди ҳоким.

Соҳага яқин кишилар ҳокимнинг бу гапларида жон борлигини айтади. Умуман, тиббий таъминот масаласида марҳум президент Каримов давридаги бундай салбий амалиётга ҳали барҳам берилмаган.

“Ҳозир тиббиёт муассасалари таъминоти учун аввалгидан ҳам кўп маблағ ажратиляпти. Бундан хулоса шуки, давлатнинг пулини туя қилиш кўлами ҳам олдингидан каттароқ”, дейди улгуржи дори-дармон савдоси билан шуғулланувчи тадбиркорлардан бири “Элтуз” билан суҳбатда. 

Ҳокимнинг иддаоларига жавоб қайтарган Соғлиқни сақлаш вазирлиги эса вилоятда шифохоналар эҳтиёжи учун сотиб олинган тиббий буюм ва дори-дармонларнинг мувофиқлик сертификати ҳам бўлмаганини билдираётир. 

Агар бу ўринда вазирлик ҳақ бўлса, сертификати бўлмаган маҳсулотларни харид қилганлар, агар ҳокимлик ҳақ бўлса, Тошкентдаги “фоизчи” воситачиларга чора кўриш керак бўлади. 

Эътибор беринг, ҳоким томонидан айтилган иддаолар асосида қандайдир иш қўзғатилгани ҳақида ҳали бирорта расмий хабар йўқ. Ҳамма ҳокимнинг “сўконғич оғзи”ни муҳокама қилиш билан банд.

Ҳолбуки, бу ўринда гап миллиардлаб маблағ тўғрисида кетмоқда. Парк учун ажратилган пулни ўмарганлар, чиқинди ўрнига шағал ташиб юрган машиналар, сифатсиз (балки сифатсиз эмасдир!!!) тиббий буюм ва дори-дармонлар масалалари ҳуқуқий баҳосини олиши керак. 

“Элтуз”нинг Ўзбекистондаги ҳамкори
Eltuz.com

Тағин ўқинг
27 март 2017
Баҳор дунёнинг турли нуқталарида турлича келади. Чунки баҳорни ҳамма ўзгача талқин қилади, ўз билганигача таърифлайди. Ўзбекистоннинг босма нашрлари ҳам ...
6 март 2018
Устидан Жиноят кодексининг 165, 205, 210-моддалари бўйича жиноят иши қўзғатилиб, 22 февралдан бери ҳибсда қолаëтган собиқ Бош прокурор Рашиджон ...
3 август 2020
Ўзбекистонда соғлиқни сақлаш тизимидаги вазият ёмонлашган бир пайтда Тошкент шаҳри ҳокими билан боғлиқ хусусий университет тўғрисидаги давлат ҳужжатлари ғазаблантирмоқда. ...
7 декабр 2016
Жаҳон ҳамжамияти, ўзбек фуқаролик жамияти фаоллари ва ЕҲҲТ кузатувчилари сайловларнинг бу сафар ҳам эскича ўтганини эътироф қилди, гарчи ўзбек ...
Блоглар
17 март 2024
Рассом Туз бир мавзу муҳокамасини бошласа ағдар тўнтарини чиқариб барча қирраларини ўрганади. Танганинг ағиниям¸ бағиниям¸ ...
14 феврал 2024
«Ёшлар» телеканалида содир бўлаётган коррупция олдида «Спорт» телеканали директори Зоҳид Каримов қўй оғзидан чўп ололмайдиган ...
13 феврал 2024
Тармоқнинг ўзбек сегменти ўзбек давлат рамзларига нафратни парваришламоқда. Ижтимоий тармоқларда маҳалла раиси ва фаолларнинг давлат ...