Толиблар ўзбек тилини мактаб дастуридан чиқариб ташлади

Афғонистонда толиблар ўзбек тилини мактаб дастуридан чиқариб ташлади. Бу ҳақдаги хабар ва дарс жадвали 24 август куни ижтимоий тармоқда пайдо бўлди.

“Ўтган 20 йил давомида Афғонистоннинг ўзбеклар яшайдиган ҳудудларида жойлашган мактабларда ўзбек тили дарслари ўтказиларди. Бугун толиблар бу дарсларни олиб ташлашди, унинг ўрнини арабча билан алмаштиришди.

Бундан ташқари, «Толибон» режими Амир Темур, Шайбонийхон, Машраб, Ғазнавий ва Беруний меросларини ўрганишни, шашмақомни, навоийхонликларни ва навоийшуносликни тақиқлаган. «Толибон» шеъриятни ҳам тақиқлаган. Шундай қилиб, Абдулазиз Комилов ва уни тинглаб юрган «бизнинг давлат» Афғонистонда ўзбек маданияти ва ўзбек меросининг йўқ қилиниши бошланишига ўз ҳиссаларини қўшдилар”, дея изоҳ қолдирди ўзбек таҳлилчиси Анвар Назир ўзининг фейсбук саҳифасида.

У ўз изоҳига толиблар тузган дарс жадвалини илова қилган, унга чиндан ҳам ўзбек тили киритилмаган.

Пуштун тили устувор бўлган Афғонистонда маҳаллий ўзбеклар аҳоли сони жиҳатидан 4-ўринда туради.

Eltuz.com