O‘zbekistonning kasod bo‘lgan darbadar mashinalari Rossiyadan qaytariladi

Shu kunlarda o‘ndan ortiq “O‘zavtosanoat” xodimlari va ustalar zudlik bilan Rossiyaga hizmat safariga jo‘natilgan.
GM Uzbekistan zavodidagi muhandisning Eltuz.com muxbiriga aytishicha, “safarga ketgan xodimlar Rossiya avtosalonlarida o‘tmay yottan buzuq o‘zbek mashinalarini ta'mirlab O‘zbekistonga qaytarish” bilan shug‘ullanishadi.

O‘tgan hafta qamoqqa olingan GM Uzbekistan Bosh direktori Tohirjon Jalilovning o‘rniga bosh direktor vazifasini vaqtincha bajaruvchi etib tayinlangan Rustam Rajabov “Tashqaridagi qarovsiz o‘zbek mashinalarini O‘zbekistonga qaytarib aholiga sotish” vazifasini qo‘ygan.

Bu esa O‘zbek avtomobillarini eksport qilish g‘oyasi o‘lganidan nishona sifatida ko‘rilmoqda.

O‘tgan hafta Eltuz.com GM Uzbekistan rahbariyati Ravon avtomashinalarini Rossiyaga eskport qilish jarayonida kriminal sxema ishlatib katta miqdordagi mablag‘larni o‘zlashtirganlikda gumonlanib qamoqqa olingani haqida maqola e'lon qilgan edi.

Ravon brendi Rossiya vakolatxonasi rasmiysi Yelena Kuznetsovaning Ozodlik radiosiga bildirishicha, O‘zbekistonda GM Uzbekistan rahbariyatiga nisbatan boshlangan tergovga 2008 yildan 2015 yilgacha yuz bergan va birgina Rossiyaning AvtoVAZ shirkatiga 73 milliard rubl ziyon olib kelgan voqealar sabab bo‘lgan.

Rossiya shirkatlarining ziyon ko‘rishi ortidan GM Uzbekistandagi kriminal sxemalar ikki davlat rahbarlari munoqashasiga mavzu bo‘lgan.

Eltuz.com muxbirining o‘rganishicha, bu masala 26 aprel kuni O‘zbekiston va Rossiya rahbarlarining uchrashuv paytida ham kun tartibining matbuotga ochiqlanmagan qismidan o‘rin olgan.

Eltuz.com ilgari yozganidek, bosh vazir o‘rinbosari, ayni paytda «O‘zavtosanoat» AK boshqaruv raisi, Mashinasozlik, elektrotexnika va aviatsiya sanoatini rivojlantirish, mahsulotlarni standartlashtirish masalalari majmuasi rahbari “Ulug‘bek Ro‘ziqulov mamlakatdan chiqib ketish paytda MXX xodimlari tarafidan aeroportda to‘xtatilib izolyatsiya qilingan«.

«O‘zavtosanoat» mulozimlaridan birining (Uning aniq ismi sharifi taxririyatda mavjud) Eltuz.comga aytishicha, mashina janjaliga O‘zbekistonning sobiq Bosh prokurori Rashidjon Qodirov va O‘zbekiston

Davlat soliq qo‘mitasi raisi Botir Parpievning ham aloqadorligi tekshirilmoqda.

Manbaning aytishicha, Ro‘ziqulov bilan birgalikda sobiq Bosh prokuror Rashidjon Qodirov ham GM-Uzbekistan bilan bogliq kriminal sxemalarga oid jinoyat ishi bo‘yicha tergovchilarning savolnomalarini o‘qimoqda.

Abdujamil Do‘stmuhammad
Eltuz.com