Asosiy mavzular
3 may 2018

Hukumat a'zolarisiz o‘tgan hukumat soati

Oliy Majlis Qonunchilik palatasida O‘zbekiston parlamenti tarixidagi ilk hukumat soati hukumat a'zolarisiz o‘tkazildi.

“O‘zbekiston Respublikasi Oliy Majlisi Qonunchilik palatasining reglamenti to‘g‘risida”gi va “Parlament nazorati to‘g‘risida”gi qonunlarga muvofiq bo‘lib o‘tgan ushbu tadbir hukumat hali ham deputatlarni bir pulga olmasligini yana bir bor isbotladi, deb aytsa bo‘ladi.

Mazkur tadbir haqida O‘zbekistondagi ko‘pgina nashrlar xabar tarqatdi. Lekin birorta xabarda parlamentdagi hukumat soatida hukumat a'zosi ishtirok etgani haqida ma'lumot berilmadi.

Ushbu xabarlarga ko‘ra, parlamentdagi hukumat soatida respublika aholisini toza ichimlik suv bilan ta'minlash hamda ichimlik suvni tejamkorlik bilan ishlatish borasida olib borilayotgan ishlar, shuningdek, aholini va tibbiyot muassasalarini arzon va sifatli dori-darmon vositalari hamda tibbiyot buyumlari bilan ta'minlash, ayniqsa, joylarda ijtimoiy dorixonalarni tashkil etish holatlari to‘g‘risidagi masalalar ko‘rib chiqilgan.

Parlamentdagi manbaning aytishicha, Qonunchilik palatasi tarixidagi ushbu tadbirga hukumat a'zolari hisoblanadigan vazirlar emas, balki ularning o‘rinbosarlari kelgan.

O‘zbekiston parlamenti tarixidagi ilk shunday tadbirga nisbatan bunday munosabat ayrim deputatlarning tushunmovchiligiga ham sabab bo‘lgan.

Bu tushunmovchilikka javoban, parlamentdagi manbaning bildirishicha, deputatlar huzuriga kelishi kerak bo‘lgan vazirlar ayni paytda prezidentning muhim topshiriqlarini bajarish bilan bandligi ma'lum qilingan.

O‘zbekistondagi axborot manbalari bu tadbirni baladparvozlik ruhida yoritdi. Hukumat soati prezidentning harakatlar strategiyasi dorasida bo‘lib o‘tganiga urg‘u berildi.

“Mazkur institut, birinchidan, hukumatning parlament bilan munosabatlardagi mas'uliyatini oshirsa, ikkinchidan, joylarda to‘planib qolgan, aholini o‘ylantirayotgan masalalarni hal etishga xizmat qiladi. Ta'kidlash joiz, hukumat soati harakatlar strategiyasida ko‘rsatib o‘tilgan davlat va jamiyat qurilishini takomillashtirish yo‘nalishida ham muhim ahamiyatga ega”, deya izohlar berdi “qo‘lbola” ekspertlar.

Aslida esa parlamentdagi manba o‘z qadrini oshirishga ishtiyoqmand deputatlar hukumatning bunday mas'uliyatsizligidan norozi bo‘lganini aytmoqda.

Shunga qaramay, deputatlar hukumat a'zosi ishtirok etmagan hukumat soatini odatiy tadbir sifatida qabul qilishga jur'at eta olmagan.

Xulosa shuki, O‘zbekistondagi parlamentarizm yana bir bor mag‘lubiyatga uchradi. Ilk hukumat soati sifatida tarixga yozilgan tadbirda hukumat a'zolari ishtirok etishni o‘ziga ep ko‘rmadi.

Sardor Azim
Eltuz.com

Tag‘in o‘qing
14 oktyabr 2021
Dastlab bolsheviklar Yosh buxoroliklar, jadidlarning kommunistik partiyaga qo‘shilgan a'zolaridan iborat Buxoro Xalq Sovet Respublikasini tuzdilar.  Bu respublika rahbarlaridan biri ...
12 iyun 2022
Avangard san'atning minglab qimmatli namunalari saqlanayotgan o‘zbek muzeylari va mamlakatda faol ijod qilayotgan 500 dan ortiq rassom ijodi O‘zbekiston ...
10 dekabr 2019
22 dekabrda O‘zbekiston Oliy Majlisi Qonunchilik palatasi va mahalliy kengashlariga saylov bo‘lib o‘tadi. Shu kuni rasmiy ravishda ro‘yxatga olingan ...
16 dekabr 2016
«Xalq bilan fikrlashgan odam kam bo‘lmaydi», deya mulohaza qildi «O‘zbekiston ovozi» gazetasi (13.12) saylangan prezident Shavkat Mirziyoevning 2017 yilni ...
Bloglar
28 may 2024
Men millatchi emasman! Lekin qaytadan ta'mirlatilgan va Toshkent shahrining sobiq hokimi J. Ortiqxo‘jaev tomonidan Pasxaga ...
11 may 2024
1944 yilning 11 mayida Stalin barcha qrim tatarlarini Qrimdan surgun qilish haqidagi mash'um qarorni imzoladi. ...
6 may 2024
Hayrli kun! Urganch shahrida yashayman. Bugun quyidagi voqea yuz berdi: men avtobusda telefonda gaplashib turgandim. ...