Asosiy mavzular
6 iyun 2019

Prezident aldanishga moyilmi?

Shuncha marta aldanganiga qaramay, hali-hunuz birorta ko‘zbo‘yamachiga yolg‘oni uchun jiddiy jazo bergani ommaga aytilmagani O‘zbekiston prezidentining o‘zi aldanishga moyil emasmi, degan savolni o‘rtaga chiqaradi.

Oldingi yili davlat rahbarini Qashqadaryoda aldashgan edi. Prezident yuradigan yo‘llarning chetida qo‘lbola issiqxonalar qo‘ziqorindek ko‘karib chiqqandi.

O‘shanda mustaqil OAV shov-shuv ko‘targanidan so‘ng hukumat yig‘ilishida Qashqadaryoning hokimi prezidentni aldaganini bilvosita tan olgan, buning uchun esa u oddiy hayfsan bilan qutulib qolgandi.

“Hammasini videoga olib, plyonkaning ostida nima bor, nima yo‘qligini ko‘rsatib qo‘yibdi. Ekilmaganiniyam. Bitta ko‘zbo‘yamachilikni deb butun dunyoga sharmanda bo‘ldingiz”, degan edi o‘shanda bosh vazir hokimga.

Shu kunlarda esa Andijon viloyati hokimi xol qo‘yib o‘tiribdi. Chunki u Qashqadaryodagi yolg‘onlardan xulosa chiqarmagan, aksincha, ulgi olgan.

Endi esa qo‘ygan xolini oqlash bilan ovora. Oqlayman deb qilmagan ishi qolmayapti. “Qo‘lbola” jurnalistlari esa hokimlikning yolg‘onini fosh qilgan xorijiy OAVlarni “umumiy dushman”ga ham chiqarib bo‘ldi.

Bunisi ham mayli, mana shu yolg‘onni urchitishda bevosita ishtirok etgan telekanal ham jim-jit. Go‘yoki yolg‘on bo‘lmagandek. Demak, bu telekanal bechora ayollarga uy berilishi yolg‘onligini avvaldan bilgan va bila turib yolg‘onni qo‘llab-quvvatlagan, degan xulosa kelib chiqadi bundan.

E'tibor berilsa, yolg‘onchilarning haybarakallachilari ham ko‘p. Ular yolg‘onni fosh qilganlarga qarshi shunday kurashadiki, shularning ham bir manfaati borga o‘xshaydi-yov, degan xayolga boradi kishi.

Umuman, yolg‘onchilik, soxtalik, ko‘zbo‘yamachilik keyingi yillarda prezidentni barcha safarlari davomida ta'qib qilayotganini kuzatish mumkin.

Davlat rahbari qaysi viloyatga bormasin, avvaldan u yuradigan barcha yo‘llar asfaltlanadi, ko‘chalar obodonlashtiriladi, uylarning devorlari, tomlari bo‘yaladi. Prezident yurmaydigan ikki qadam naridagi ko‘chalar esa o‘ydim-chuqur bo‘lib yotadi, hamma joy chiqindi, kulbalar vayron.

Yurtboshining kelishiga tayyorgarlik esa qurbonsiz bo‘layotgani yo‘q. O‘tgan yili prezidentning Samarqandga tashrifi arafasida ko‘cha tozalashga chiqqan Diana Yenikeevani Qattaqo‘rg‘onda “Kamaz” urib ketib o‘ldirgandi.

Mirziyoevning Andijonga o‘sha shov-shuvga sabab bo‘lgan safari oldidan ekilgan gullarni sug‘orayotgan uch ayolni ham mashina urib ketdi. Ikkisi o‘ldi, biri mayib bo‘ldi.

Mart oyida Navoiyga tashrif ham ko‘zbo‘yamachilikdan xoli bo‘lgani yo‘q. Prezidentga “bir yarim mingta ish o‘rni yaratadigan” loyiha sifatida taqdim etilgan G‘ozg‘on shaharchasidagi “Marmarobod” davlat unitar korxonasida shu kunlarda ishchilar soni 20 taga ham etmaydi.   

Buning ustiga, u yerga boshqa joydan xo‘jako‘rsinga olib kelingan texnika va uskunalar ham tashrifdan so‘ng g‘oyib bo‘lgan.

Xullas, bunday misollarni ko‘plab keltirish mumkin. Rahbarlar prezident oldida o‘zini ko‘rsatish uchun hech narsadan, hatto uning g‘azabidan ham qo‘rqmayotgandek taassurot uyg‘onmoqda.

Bular hatto o‘z obro‘yiga putur yetib qolishidan qo‘rqib, davlat rahbariga arz aytgani keluvchilarga zo‘rlik ishlatishdan ham toymayapti.

Mirziyoevga arz qilmoqchi bo‘lgan andijonlik Yodgora Yunusovani Andijon hokimligi mulozimlari hokimlikning xalq qabulxonasida olti soat ushlab turgan.

Umuman, davlat rahbarining kelishiga joylarni istalmagan shaxslar “tozalash” yangilik emas. Bu “hunar” Karimov rejimi davrida juda keng qo‘llanilardi va hozir ham yumshoqroq ko‘rinishda davom etayotgandek ko‘rinadi.

Marhum prezident Islom Karimov shirin yolg‘onlarga o‘ch edi. Uning kech kuzda g‘o‘za chanoqlariga skoch bilan yopishtirilgan paxta “etishtirilgan” dalaga tashrif buyurganini hali ko‘pchilik zaharxanda bilan eslaydi.

Afsuski, bugun uning merosxo‘ri Shavkat Mirziyoevni ham shirin yolg‘onlar, soxta investitsiyalar, ko‘zbo‘yamachiliklar bilan chalg‘itishga urinish juda kuchli ekani anglashilyapti.

Ammo prezidentning o‘zi bu yolg‘onchilarga qattiqqo‘llik bilan javob qaytarayotganiga oid birorta mujda ko‘rinmayapti.

Hozir jamiyat nisbatan ochiq. Odamlarda muqobil axborot olish imkoniyati kattaroq. Prezident aldanganini xalq turli manbalar orqali bilib olyapti.

Prezidentning o‘zi-chi? O‘zi aldanganidan xabardormi? Agar xabardor bo‘lsa, nega jim? Nega yolg‘onchi va ko‘zbo‘yamachilarning dumi tagiga yantoq qistirmayapti?

Bir vaqtlar odamlar o‘zini “Karimovning bunday narsalardan xabari yo‘q”, deb ovutardi. Endi Karimov davrida ahvol qanchalik yomon bo‘lganini uning merosxo‘ridan deyarli har majlisda eshitayotgan odamlar o‘zini qanday ovutsin?

Bu savollar javobsiz qolsa, prezidentning ijobiy imijiga putur yetib boraverishini esdan chiqarmaslik kerak.

Qolaversa, yolg‘onchi rahbarlardan qutulmas ekanmiz, ertangi taraqqiyot istiqbollari ham xira tortib boraveradi.


Eltuzning Toshkentdagi muxbiri

Tag‘in o‘qing
28 dekabr 2019
Xorazmdagi psixdispanserda uch oy ushlab turilgan bloger Nafosat Olloshukurova 28 dekabr kuni ruxiy kasalxonadan chiqarildi. Eltuz muxbirining xabar berishicha, ...
18 may 2017
Britaniyada yashayotgan, 69 yoshn o‘zbek professori Ahmad Hoji Xorazmiy bir soatlik qo‘shiqlari dastasini yutub kanaliga qo‘ydi. Dam tor, dam ...
6 noyabr 2017
O‘zbekiston Bosh prokuraturasidagi ishonchli manbaning bildirishicha, yaqinda Toshkent viloyati prokuraturasi viloyat ichki ishlar boshqarmasi xodimlari tomonidan Yangiyo‘l tumanida yashovchi ...
20 fevral 2017
O‘zbek prezidentining Moskvaga safariga to‘g‘ri keladigan sirli ko‘rgazma ortidagi gap-so‘zlar Rossiya matbuoti Nukusdagi Savitskiy nomidagi muzey durdonalaridan tarkib topgan ...
Bloglar
18 yanvar 2021
Bor ekanda yo‘q ekan, och ekanda to‘q ekan, yaqin-yaqin zamonlarda yot bosqinchilarning yuz yildan ko‘proq ...
13 yanvar 2021
Kun.uz professionallarni ishga qabul qilar emish. Katta maosh, ikki mahal ovqat. Sihatgohning o‘zi-ya! Bunday ishxonani ...
11 yanvar 2021
Taniqli shoir Bahrom Ro‘zimuhammad 60 yoshda Bahrom aka indamaygina oltmishga kiribdi. Botinan qaralganda, unday emas. ...