Buxoro sobiq hokimining qamalgan o‘g‘li zamhokim bo‘ldi

Salom qadrli muhlislar, bugun 12 sentyabr Eltuz o‘zining kundalik ko‘rsatuvlarini davom ettiradi.

Buxoro viloyati sobiq hokimining uyushgan jinoiy guruh tuzish, o‘g‘rilik va davlat mulkini talon-toroj qilish kabi jinoyatlarda ayblanib 14 yilga qamalgan o‘g‘li Sharofiddin Husenov Buxoro shahar hokimning investitsiyalar va tashqi savdo masalalari bo‘yicha o‘rinbosari lavozimiga tayinlandi.

Sharofiddin Husenov 2011 yilda ukasi Sadriddin Husenov, amakisi, do‘stlari bilan birgalikda Buxoroda o‘ta og‘ir jinoyatlar sodir etgani uchun 14 yilga ozodlikdan mahrum etilgan edi.

O‘shanda O‘zbekiston tarixida ilk bor 16 yildan buyon viloyat hokimi lavozimida ishlab turgan hokimning o‘g‘illari ustidan sud shu viloyatning o‘zida bo‘lib o‘tgan va mahalliy telekanallar bu sud jarayonini batafsil yoritgan edi.

Vaqt o‘tib, prezident Karimov vafotidan so‘ng, Samoyiddin Husenov oqlandi. Joriy va o‘tgan prezidentlik saylovlarida  ishonchli vakil sifatida ham qatnashdi.

Naqd 270 tomlik jinoyatlari bilan dovrug‘i O‘zbekistonga yoyilgan Samoyiddin Husenov yaqinlari ham sekin asta qamoqdan chiqa boshladi.

Mana, o‘sha mashhur jinoyat ishining asosiy figuranti Sharofiddin Husenov shahar hokimiga o‘rinbosar bo‘ldi.

Bu haqda Eltuzga xabar bergan mahalliy hokimiyat vakili o‘z ishini bu yerda davom ettirish istagi qolmaganini aytdi.

«Biz tunu kun majlislarda qatnashib, mahallalar kezib, rahbarlardan so‘kish eshitib, ishlab yuramiz. Ammo qaerdandir sobiq o‘g‘rilar amalga kelishadi, biz yana chekkada qolamiz,” deya yozdi hokimiyat vakili.

Yana bir manbaning taxmin qilishicha, Sharofiddin Husenov  Jamol Nosirov o‘rniga Buxoro shahar hokimi lavozimiga tayyorgarlik uchun yuborilgan bo‘lishi ham mumkin.

Eltuz mamlakatda kechayotgan kadrlar almashinuvi, korruptsiya va nepotizm ko‘rinishlarini yoritishda davom etadi. Ko‘rsatuvlarimizni kuzatib boring, kanalimizga obuna bo‘ling.

OtvetitPereslat