Asosiy mavzular
11 noyabr 2019

Abdulloh 14 kun qaerda bo‘lganini nega aytmadi?

Oddiygina avariya sodir etgani sabab ichki ishlar idorasiga olib borilgani ortidan ikki hafta bedarak ketgan andijonlik Abdulloh Tohirovning boshidan nelar kechgani hamon noma'lum qolmoqda. 

Ammo bu avariyada zararlangan mashina Andijon viloyati IIB terrorizm va ekstremizmga qarshi kurashish boshqarmasi boshlig‘i, podpolkovnik Qahramon Ergashev boshqaruvida bo‘lgani, keyinchalik avariya sababchisi bo‘lmish Abdulloh ishi bilan “boshqa idora” shug‘ullanayotgani haqida xabarlar urchigani voqeaga chuqurroq e'tibor qaratishni talab etadi. 

Abdullohning ikki hafta bedarak ketishi “O‘ynashmagin arbob bilan, arbob urar har bob bilan” degan maqolning bugungi O‘zbekistondagi real ko‘rinishi emasmikin?

Masalaning boshqa bir jihati ham shundan darak beradi. Ya'ni Abdullohning otasi o‘g‘li topilgandan so‘ng shuncha vaqt qaerda bo‘lganini ochiqlamayapti. 

“Qaerda bo‘lgani haqida qiziqmadim”, deya ishonish umuman qiyin bo‘lgan izoh bilan vaziyatdan chiqishga harakat qilmoqda ota.

Balki ochiqlashdan cho‘chiyotgan bo‘lishi, yana ehtimolki, cho‘chitilgan bo‘lishi ham mumkin. 

Chunki Abdullohning berdarak ketishi Ichki ishlar vazirligi va o‘sha nomi aytilmayotgan “boshqa idora” bog‘liq. 

Hatto matbuotda va ijtimoiy tarmoqlarda bu voqea bo‘yicha shov-shuv ko‘tarilgandan keyin Abdullohning taqdirini o‘rgangan O‘zbekiston yoshlar ittifoqi ham “boshqa idora”ning nomini ochiqlamadi. 

Abdulloh bedarak ketganidan so‘ng uning yaqinlari, shu bilan birga, advokat murojaat etmagan yuqori idora qolmagan. Lekin birortasidan javob ololmagan.

Xo‘p, Abdulloh sog‘-salomat uyiga qaytib kelibdi, endi shu masalani yana ko‘tarib, ota go‘ri qozixona qilish shartmi, degan savolni o‘rtaga tashlashi mumkin kimdir.

Ha, bu masalani aslo e'tiborsiz qoldirish kerak emas. Chunki u o‘zbek jamiyatidagi yana bir og‘riqli nuqtani yaqqol ko‘rsatib berdi.

Ya'ni ichki ishlar xodimlari tomonidan oddiy hodisa sabab olib ketilgan odamning qaerda ekanini na IIV, na “boshqa idora” hatto otasiga ham xabar qilmadi. 

Ayni shu voqea bu kabi idoralar hamon jamiyat oldida hisobdor bo‘lish majburiyatini his etmayotgani, bu majburiyatni nazar-pisand qilmayotganini yana bir bor anglatib turibdi. 

Agar kuchishlatar tuzilmalar jamiyat oldida hisobdor bo‘lmas ekan, bu jamiyatda rivojlanish, demokratiya bo‘lishi mumkin emas. 

Aynan shuning uchun Abdulloh voqeasi aslo oddiy hodisa emas. Bu voqeaga imkon qadar tezroq oydinlik kiritilishi kerak.

Eltuz.com

PS. Hozircha mamlakatdagi faqat bitta siyosiy kuch – “Adolat” partiyasi bu voqeaga munosabat bildirib, “Abdullohni ushlab turganlarni jazolash kerak”, degan bayonot bilan chiqdi. 

Lekin hozircha mas'ul idoralar voqea yuzasidan biror munosabat bildirgani yo‘q.

Tag‘in o‘qing
30 aprel 2019
Prezidentning to‘ng‘ich qizi Saida Mirziyoeva 15 aprel kuni Axborot va ommaviy kommunikatsiya agentligi rahbari o‘rinbosari etib tayinlangani ortidan matbuotda ...
14 sentyabr 2022
O‘zbekiston «Erk» Demokratik partiyasi lideri bilan bilan qilingan suhbat 2018 yil yozilib, ba'zi sabablarga ko‘ra e'lon qilinmagan edi.Eltuz uni ...
6 yanvar 2016
Aramays Avakyan va uning do‘stlari ustidan sud bugun soat 11 da, kutilmaganda boshlandi. Sudlanuvchilarning yaqinlari sud boshlanishi haqida tasodifan ...
29 dekabr 2020
Antik tarixiy manbalarda buyuk sarkarda Aleksandr Makedonskiy eramizdan oldingi 329-326 yillarda barpo ettirgani aytiladigan Kampirtepa yodgorligi janubi-g‘arbiy devorining o‘rta ...
Bloglar
11 may 2024
1944 yilning 11 mayida Stalin barcha qrim tatarlarini Qrimdan surgun qilish haqidagi mash'um qarorni imzoladi. ...
6 may 2024
Hayrli kun! Urganch shahrida yashayman. Bugun quyidagi voqea yuz berdi: men avtobusda telefonda gaplashib turgandim. ...
30 aprel 2024
1990 yilning 30 aprelida mustaqil O‘zbekiston tarixidagi ilk demokratik partiya – «Erk»ning ta'sis qurultoyi bo‘lib ...