Asosiy mavzular
12 noyabr 2019

Qozonga yaqin borsak, qorasi yuqadi

“Milliy tiklanish” demokratik partiyasi rahbari Alisher Qodirov O‘zbekistonning Yevroosiyo iqtisodiy ittifoqi (YeOII) tarkibiga kirish borasidagi pozitsiyasi qat'iy emasligini bildirib qo‘ydi. 

Bundan avvalroq, aniqrog‘i, 10 oktyabr kuni A.Qodirov bu mavzuda gapirib, “YeOII nomi bilan iqtisodiy bo‘lgan, ammo ortida yashirin siyosiy maqsadlarni ham ko‘zda tutgan tashkilot”, deya bayonot bergan edi.  

Endi esa u yana shu mavzudagi savolga: “Milliy tiklanish” partiyasi O‘zbekistonning iqtisodiy va siyosiy manfaatlariga xizmat qiladigan har qanday harakatni qo‘llab-quvvatlaydi”, deya javob qaytarmoqda. 

Ta'kidlash kerakki, oktyabr oyida O‘zbekistonning YeOIIga a'zo bo‘lishi mavzusi atrofida bahs-munozaralar kuchaygan paytda bu tuzilmaga qo‘shilish mamlakat uchun nomaqbul ekani haqida faqatgina “Milliy tiklanish” ochiqchasiga o‘z pozitsiyasini bildirgandi. 

Ammo hukumat rasmiylari, birinchi navbatda, Senatda turib O‘zbekistonning rasmiy pozitsiyasini bayon qilish bilan shug‘ullanuvchi Sodiq Safoev bu tuzilmaga a'zolik haqida iliq fikrlarni bildirishi ortidan “Milliy tiklanish”ning shashti qaytgan ko‘rinadi. 

Shu bois, A.Qodirovning bu boradagi so‘nggi qat'iyatsiz bayonotini “milliy turlanish”ning yorqin shakli o‘laroq baholash to‘g‘riroq bo‘ladi. 

Boshqa partiyalarchi? Hozircha ular “siyosiy hushyorlik” tamoyillariga tayangan holda “o‘zaro hamkorlik yaxshi”, “bu masalani milliy manfaatlar nuqtai nazaridan hal etish kerak” qabilidagi umumiy gaplardan nari o‘tayotgani yo‘q.

Hamma hozircha prezident Shavkat Mirziyoevning YeOIIga a'zolikka oid ochiq bayonotini kutayotgani shubhasiz.

Ayni shunday bayonotdan so‘ng mamlakatdagi siyosiy kuchlarning bu masaladagi pozitsiyasi “qat'iylashadi”.

Hozircha esa hukumat ham, siyosiy partiyalar ham O‘zbekistonning YeOIIga a'zolik masalasida aniq fikrni ochiq aytayotgani yo‘q. Ular ikki o‘t orasida qolgan.

Bir tomondan, 2017 yilning bahorida tashqi ishlar vaziri Abdulaziz Komilov O‘zbekistonning tashqi siyosatdagi asosiy pozitsiyasi turli tuzilmalarga, jumladan, Kollektiv xavfsizlik shartnomasi tashkiloti hamda Yevroosiyo iqtisodiy ittifoqiga kirmaslik ekani haqida bayonot berib qo‘ygan. 

Ikkinchi tomondan, Rossiya O‘zbekistonni o‘z ta'sir doirasiga tobora chuqurroq kiritishga qaratilgan siyosat yuritmoqda. Bu yo‘lda har qanday jiddiy iqtisodiy-siyosiy bosim o‘tkazishga tayyor ekaniga ishora qilmoqda. 

Agar Rossiyaning aytganiga yursak, O‘zbekiston  tashqi siyosatining asosiy tamoyillarida o‘zgarish yuz berdimi, degan savol yuzaga chiqishi turgan gap. Bu esa mamlakat tashqi siyosatining qat'iyligiga nisbatan shubha uyg‘otadi.  

Shunga qaramay, O‘zbekistonning YeOIIga a'zo bo‘lishi masalasidagi keskin bahs-munozaralar hali uzoq davom etadiganga o‘xshaydi. 

Rasmiylar bu masalada Rossiya pozitsiyasiga yondashadigan fikr bildirayotgan bir paytda mustaqil tahlilchilar va norasmiy muxolifatning, shuningdek, ijtimoiy tarmoqlardagi aksariyat foydalanuvchilarning qarashlari bir-biriga zidligicha qolmoqda.

Eltuz.com

Tag‘in o‘qing
15 fevral 2018
MXX idorasining Toshkent shahri markazida joylashgan bosh binosidan ko‘chirilayotgani haqida 14 fevral kuni «Eltuz» nashri xabar bergan edi. Toshkentning ...
31 mart 2017
Toshkentdagi «Mirza Yusuf» masjidi imom xotibi, 42 yoshli, Rahmatulloh Sayfuddinovning erkaklarning doyalik qilishiga qarshi targ‘iboti ijtimoiy tarmoqda va turli ...
24 noyabr 2020
«Humo» nomli uchoq shirkati haqida gap chiqishi bilan eronlik do‘stlarim o‘zbeklarni plagiatda aybladi. Eronda «Humo» degan uchoq shirkati bor ...
26 may 2022
(Taniqli shoir va siyosatchi Muhammad Solihning “Imperativ” kitobidan 51-qism. Audiokitob matnini muallifning o‘zi o‘qigan) «O‘limni o‘ylash payti kelmadimi?» savol ...
Bloglar
22 noyabr 2024
Qudratlar ayrilgan tuzum, ya'ni demokratiya avtokratiyadan yaxshidir. Bu gapni aytaverib tilim qavardi. Demokratik jamiyat bo‘lgan ...
28 oktyabr 2024
(Eltuzga telegram orqali kelgan maktub) “Xorazm viloyati Urganch tumanlararo sud raisi Yo.A.Almosov janobi oliylarining bugungi ...
24 oktyabr 2024
Bir odam hammaga yaxshilik qilishga so‘z beribdi. Qo‘shnisi kelib uni otini so‘rab olib minib ketganicha ...