Asosiy mavzular
10 may 2021

Elga tarbiyadan dars beradigan firibgarlar

Xorazmning Xiva tumanida bir kambag‘al beva ayolning o‘g‘li nomiga olingan 30 million so‘m kredit mahalla raisi va o‘qituvchi doxil bank xodimlari tomonidan naqdlashtirish yo‘li bilan o‘zlashtirilib, yana ayolning oilasiga ham tazyiq o‘tkazilib kelinmoqda. 

“Eltuz” nashriga Xiva tumanining “Pirnaxos” mahallasidan maktub jo‘natgan Nigora Yusupova shu haqda iddao qilar ekan, arzini hech kim tinglamayotgani, bu boradagi tergov ishlari atayin cho‘zib kelinayotganini aytdi.

Nigora Yusupova, maktubda yozilishicha, yetti farzand – olti qiz, bir o‘g‘ilning onasi. Kam ta'minlangan oila sifatida “Temir daftar”da turadi. Eri 2013 yilda vafot etgan. Bir qizi nogiron. O‘zi maktabda farrosh bo‘lib ishlaydi. 

Nigora Yusupovaning Eltuzga yozgan maktubi parchasi

Oilaning asosiy boquvchisi ayolning o‘g‘li Abdulla Ibragimov bo‘lib, u goh-gohida Toshkentga borib, qurilish ishlarida ishlab, ro‘zg‘orning kam-ko‘stini to‘ldirib turadi. 

Maktubda bildirilishicha, “Pirnaxos” mahallasi raisi Oybek Safoev, tumandagi 18-maktabning tarbiya (!!!) fani o‘qituvchisi Bekzod Bobojonov “Mikrokreditbank”ning tuman bo‘limidan 2020 yil avgustda qoramol uchun 30 million so‘m kredit olgan.

E'tiborlisi, bank xodimlari bilan til biriktirilgan holda olingan bu kredit Nigora Yusupovaning o‘g‘li Abdulla nomiga rasmiylashtirilgan. Bir fermer xo‘jaligi nomiga o‘tkazilgan pul keyinchalik naqdlashtirilib, o‘zlashtirilgan. 

“Endi nima qilishni bilmayman. Goh-gohida bankdan kreditning foizini so‘rab kelishyapti. To‘lashga pulim yo‘q. Oyligimni ro‘zg‘orimga zo‘rg‘a yetkazaman. Meni hech kim tinglamayapti. Biz na qoramolni, na 30 million so‘m pulni ko‘rganimiz yo‘q. Iltimos, yordam beringlar”, deyiladi maktubda.

Unda aytilishicha, mazkur firibgarlik ishini bir oy davomida tuman prokuraturasi tergov qilgan. Keyin esa ish Xiva tumani IIBga o‘tkazilgan. Ammo IIBga o‘tkazilgan tergov ham bir oydan oshganki, tugamayapti. Nigora Yusupova va o‘g‘lining asosiy vaqti tergovga qatnash bilan o‘tmoqda. 

Ayol firibgarlikka bosh qo‘shgan mahalla raisiga uchrashganda, u tergovga qatnayvermay, arizasini qaytarib olib, o‘g‘lini ishga jo‘natishni maslahat bergan. Yaqinda esa firibgarlardan biri bo‘lmish Bekzod Bobojonov bir guruh shaxslar bilan ayolning uyiga kelib, po‘pisa qilib ketgan. 

“Hozir pandemiya davrida juda qiynalyapman. Kunda qon bosimim oshadi. Tergov esa ko‘rinib turgan firibgarlarning qilmishini yashirish maqsadida atayin ishni cho‘zyapti. Meni adoyi tamom qilishdi”, deydi Nigora Yusupova.

Prezident Shavkat Mirziyoevdan yordam so‘rar ekan, ayol: “Bu firibgarlarga qonun bormi? Iltimos qilaman sizlardan, ulardan meni himoya qilib, haqiqatni ro‘yobga chiqarib beringlar”, deb zorlanadi ayol. 

Eltuz.com

Tag‘in o‘qing
3 noyabr 2017
1 noyabr kuni AQSh prezidenti Donald Tramp grin-kart lotereyasini bekor qilishga chaqirdi. Nyu-Yorkda terrorchilik hujumini amalga oshirgan O‘zbekiston vatandoshi ...
21 aprel 2021
2021 yilning 19 mart kuni Qashqadaryo viloyatining Nishon tumanidagi Yangihayot massivida namunali uylarning tomini shamol uchirib ketgan. Uylar qurilishi ...
2 avgust 2018
Yevropada yashay boshlaganim qochqinlikning o‘ninchi yili yakunlanarkan, bugun ilk bor yarim asrlik umrim ortiga qaramoqchi bo‘ldim. Jo‘n ma'noda esa ...
8 noyabr 2016
7 noyabr kuni Armaniston respublikasi Ombudsmani Arman Tatoyan O‘zbekistonlik hamkasbi Ulug‘bek Muhammadiev nomiga maktub yo‘lladi. Bu arman ombudsmani tomonida ...
Bloglar
25 may 2021
O‘zbekistonda yaqinda o‘tkazilgan so‘rovnoma respondentlarning 10 foizdan ko‘prog‘i oiladagi zo‘ravonlikka qarshi emasligini ko‘rsatdi. Bu mamlakatdagi gender munosabatlardagi tashvishga soladigan holatdir. Bu haqda Eurasianet nashri yozdi. 15 may kuni BMTning ...
19 may 2021
Toshkent shahrida bunyod etilgan “G‘alaba bog‘i” yodgorlik majmuasida harbiy xizmatni o‘tayotgan oddiy askarlar 9 may ...
18 may 2021
1914 yilning 18 mayi deya tarix yozilgan bu surat markazida turgan Abdullabekning evarasi, shu kunlarda ...