Mamlakat birligi va bo‘linmasligi masalasida barchani hamjihatlikka chaqiramiz

Nukusdagi norozi guruh ko‘chaga odam olib chiqishga muvaffaq bo‘ldi. Buni 1 iyul kuni telegram sahifasida bir qadar yoritdik. Eltuz o‘zini Nukusdagi norozi gruppa matbuot kotibi deb atagan shaxs bilan aloqada. Ammo norozilar guruhining bu chiqishi butun Qoraqalpog‘iston siyosiy irodasini bildirmaydi.

Amudaryo, To‘rtko‘l, Beruniy, Elliqqala va Xo‘jaylidagi odamlar bilan gaplashdim. Ular nizo chiqishini istamasliklarini ochiq aytishdi. Asnoda O‘zbekistondagi separatizmni qo‘llovchi boshqa guruhlar ovozi ham chiqa boshladi. Bu jiddiy signal. Azizlar, O‘zbekistonda separatizm bilan bog‘liq nizo girdobiga tushish kabi lyuksimiz yo‘q bizlarning.

Konstitutsiyaga o‘zgartirish kiritishida huquqiy muammo yo‘q. To‘g‘ri qadam bu. Unitar davlat tarkibida yana bir suveren tuzilma bo‘la olmaydi. Shu kunlarda DAVLAT o‘zining davlat ekanini ko‘rsatishi kerak. Jiddiylik va azmu qaror – eng muhim jihat. Ën berish va emotsiyalar asiriga tushish bunday paytda to‘g‘ri kelmaydi. Shu bilan birga kuch ishlatar tizimlar o‘ta ehtiyotkorlik bilan harakat qilishi va kuch qo‘llashdan iloji bor qadar tiyilishi kerak. Zotan o‘zbeklar va qoraqalpoqlar orasida nizo tarixi yo‘q. Mamlakat birligi va bo‘linmasligi masalasida barchani hamjihatlikka chaqiramiz.

Eltuz jamoasi