Shvedlar Telia shirkatining Gulnoraga pora berganidan shokda

Stokgolm sudida Telia shirkati va Gulnora Karimova o‘rtasidagi korruptsiya ishini kuzatayotgan SVT telekanali jurnalisti Elin Yonnsson «Eltuz» muxbiri bilan suhbatida shved jamiyati bunday holatdan shokda ekanini aytdi.

Shvetsiya korruptsiya qarshi kurashish shaffofligi bo‘yicha har yili «Transperens Interneshnl» hisobotidagi beshtalikdan o‘rin olib keladi, lekin eng yirik shved mobil shirkatining Gulnoraga pora bergani mamlakatning obro‘sini to‘kdi, deydi Yonnson.

Shved jamiyati, Yonnsonning so‘zlariga ko‘ra, amaldorlarni qat'iy nazoratda ushlashga intiladi va arzimagan holat ularning amaldan haydalishiga sabab bo‘lishi mumkin.

«Ular oddiy xalq xizmatidagi mulozimlar. Agar yaxshi xizmat qilmasa, ularni haydaymiz, o‘rniga yaxshiroq odamlarni qo‘yamiz…» deydi Yonsson.

Telia sobiq rahbarlari ham jurnalistlarning fosh qiluvchi materiallaridan so‘ng pora gumoni ostida yuksak lavozimlaridan haydalishgan edi.

Sudlanuvchilarning advokatlari mobil shirkatiga davlat litsenziyasi olishda ko‘maklashgani aytiladigan O‘zbekistonning amaldagi bosh vaziri Abdulla Aripovning sudga chaqirilishini istashmoqda.

Eltuz.com