Stiv Sverdlov: O‘zbek matbuoti mening gaplarimni teskari talqin qildi

14 dekabr kuni HRW tadqiqotchisi Stiv Sverdlov O‘zbekistondagi rasmiy matbuotning ikkiyuzlamachiligi haqida maqola chop qildi.

Podrobno.uz saytida 5 dekabrda chop qilingan «Hyuman rayts votch»ning O‘zbekistondagi faoliyati hususida bergan o‘z intervyusini ko‘rib, tadqiqotchi O‘zbekistondagi tsenzurani tanasida his qilganini yozadi.

«Eng qizig‘i, umuman suhbatning e'lon qilinishi bo‘ldi. Rasmiy ro‘yxatdan o‘tgan OAV shu paytgacha mustaqil inson huquqlari guruhining ishini yoritmagan, ammo bizning tanqidiy hisobotlarimizni faqat rasmiy rad etib kelayotgan edi», deya yozadi Sverdlov.

Tadqiqotchi o‘z maqolasida Mirziyoev davrida ozroq oldinga siljish bo‘lganini aytib, ayni paytda O‘zbekistonning rivojlanishiga hali ancha borligini taassuf bilan qayd etadi. Bunga u jurnalist Bobomurod Abdullaevning qamalishi, Turkiyadan qaytgan yozuvchi Nurilla Otaxonovning uy qamog‘iga olinishini misol keltiradi.

«Podrobno.uz saytida men qayd etgan ijobiy o‘zgarishlar, jumladan, siyosiy mahkumlarning ozod qilingani haqidagi gaplarim o‘zgarmagan. Lekin yaqinda hibsga olingan jurnalistlar, qiynoqlarning keng qo‘llanilayotgani, majburiy mehnat va fuqarolik jamiyatiga nisbatan cheklovlar haqidagi tanqidlar olib tashlangan.

Qisqa qilib aytganda, o‘z-o‘zini tsenzura qilish O‘zbekistonda hali ham tirik va kuchli.

Bu intsident bizga O‘zbekistonda e'lon qilingan islohotlar katta o‘zgarishlarga olib kelmayotganidan dalolat beradi. Prezident Mirziyoev lo‘nda qilib aytishi kerakki, davlat siyosati tanqidiga nafaqat toqat qilinishi, balki olqishlanishi lozim. Bu o‘tmishning qorong‘u merosini tark qilishning yagona usulidir», deydi Sverdlov.

Eltuz.com