O‘qituvchi va doktorlarni ko‘cha supurtirgan mulozimlar izza qilindi

Vazirlar Mahkamasida 17 aprel kuni bosh vazir Abdulla Aripov raisligida o‘tgan videoselektorda o‘qituvchi va tibbiyot xodimlarini ko‘cha tozalashga jalb qilgan vazir va hokimlarga hayfsan berildi.

Hayfsan berilgan sog‘liqni saqlash vaziri Alisher Shodmonov va xalq ta'limi vaziri Ulug‘bek Inoyatov, Andijon va Samarqand hokimlari aybiga iqror bo‘lib, tavba qilishdi.

“Ular o‘qituvchi va tibbiyot xodimlariga ko‘cha supurtirib, xalqiga, prezidenti va davlatiga xiyonat qilganligini” tan olishdi va “eng og‘ir jazo bersangiz ham bizga kam“, deya bosh vazirga mo‘ltirab qarashdi.

«Barcha shahar va tuman hokimlarini oxirgi marotaba ogohlantiraman. Prezidentimiz bu vaziyat bo‘yicha qat'iy topshiriq berdi. Bu ishlaringiz – davlatimiz olib borayotgan siyosatga xiyonat! Bundan keyin takrorlansa, nafaqat ishdan olinasiz, balki tegishli tartibda jinoiy javobgarlikka ham tortilasiz», – deya qattiq ogohlantirgan Abdulla Aripov rassom Kirpi tomonidan portreti chizilishi kabi izzatga loyiq bo‘ldi.

Rassom Kirpi
Eltuz.com