Asosiy mavzular
4 dekabr 2018

Paxta dalasidan harbiy poligonlarga

O‘zbekistonda Mudofaa vazirligi qo‘shinlarining jangovar tayyorgarligini sinovdan o‘tkazish maqsadida tashkil etilgan keng ko‘lamli o‘quv mashg‘ulotlari besh kun davom etdi.

Rasmiylar bu o‘quv mashg‘ulotlari mustaqillik yillaridagi eng yirik harbiy-o‘quv amaliyoti bo‘lganini aytmoqda.

Bu xabarlarni o‘qir ekansiz, yaqindagina bundan-da “muhimroq” bo‘lgan yana bir amaliyotdan qaytgan harbiylarimiz toliqib qolmadimikin, degan xavotir ko‘ngildan o‘tdi.

Ha, yaqinda o‘n minglab askarlarimiz hatto sovet davrida ham ko‘rilmagan dolzarb front – paxta dalasidan kazarmalarga qaytib keldi.

Ular hazil ish qilgani yo‘q – milliy boyligimiz bo‘lmish paxta nes-nobud bo‘lishining oldini olib, jonini jabborga berib mehnat qildi.

Aytish mumkinki, ekstremal sharoitlarda askarlarimiz armiyada toblanganlarini hayotiy sharoitda sinovdan o‘tkazdilar.

Shu kunlarda bitta savol ochiq qolmoqda: mana shu askarlarimiz ham keng ko‘lamli mashg‘ulotlarda qatnashdilarmi, bu mashg‘ulotlar davomida ularning paxta dalasida toliqib qolganlari sezilmadimi?

Albatta, bu savolga javob topish mushkul. Zero, gap mudofaa qudratimizning holati haqida bormoqda va bu ishda pasayish bo‘lgan bo‘lsa, buni oshkor aslo oshkor qilib bo‘lmaydi.

Chunki yaqinda rus generallaridan biri Tojikistonda o‘tgan tadbirda Afg‘onistonda yangi jangari guruh vujudga kelish xavfidan ogohlantirgandi.

Dushmanlarimiz esa bizning askarlarimiz jangovar mahoratini oshirish o‘rniga paxta terib yurganini bilib qolsa, qutqusini kuchaytirishi mumkin.

Ularning ko‘zini qo‘rqitib qo‘yish uchun esa bitta harbiy mashg‘ulot o‘tkazib qo‘yishimiz kerak edi, shuni qildik ham.

Chunki bizning askarlarimiz nafaqat paxta teradi, balki harbiy texnikani binoyidek boshqaradi, yaxshi urisha oladi ham.

Bu yaqinda xalqaro miqyosda ham e'tirof etildi. Dunyoning eng kuchli armiyalari ro‘yxatida 39-o‘rinda qayd etildik.

Agar askarlarimiz bir yillik xizmatlarining 2-3 oyida paxta termay, shu paytlarda ham harbiy tayyorgarlik bilan shug‘ullansa, kamida kuchli o‘ntalikka kirishimiz ham hech gap emas.

Endi o‘ylab qarasam, rahmatli Muhammad Yusuf uzoqni ko‘ra oladigan shoir bo‘lgan ekan. Bir vaqtlar “Hali omon-omon zamon keladi, dalalarda tanklar paxta teradi”, degan edi.

Bunda u alpqomat askarlarimizni tanklarga mengzagan bo‘lsa, ajab emas. Chunki mantiqan o‘ylab qarasak, tanklar dalaga kirsa, paxtani payhon qiladi. Bizda esa hatto chorva mollariga ham paxta dalasini payhon qilishga taqiq bor.

Mana, milisalar qanchadan qancha qo‘yu mollarni so‘yib tashladi bu taqiqni buzgani uchun. Agar tanklar paxtani payhon qilayotganini ko‘rib qolishsa, xudo biladi bu tanklarni nima qilishlarini.

Agar bo‘laklarga bo‘lib yoki MIB orqali musodara qildirib, sotib yuborishsa, harbiy mashg‘ulotlarda nima bilan qatnashamiz tanksiz?

Eshak minib, ot minib jang qiladigan zamonlar o‘tib ketgan bo‘lsa. Qolaversa, eshakka ham qiron kelgan. Allaqachon so‘yilib, go‘shti sotib yuborilgan.

Shu so‘yilgan qo‘ylar va mollar haqida gap borgani uchun yana bir narsa esga tushib qoldi.

Yaqinda Ichki ishlar vazirligi O‘zbekistonda jinoyatchilik allaqancha foiz kamayganini ma'lum qildi. Bunda ham mantiq ko‘rdim.

Zero, mavsumda 2 oy davomida IIVning 10 mingdan ziyod xizmatchisi paxta dalalarida javlon urib, oq oltin terish bilan mashg‘ul bo‘ldi.

Xizmatdagi milisalar kamayishiga mos ravishda jinoyatchilik ham kamaygandek taassurot uyg‘ondi…

Gapdan chalg‘imaylik. O‘sha dunyoning eng kuchli armiyalari ro‘yxatini ko‘zdan kechirib, aksariyat mamlakatlar armiyalarining kuchi va paxta o‘rtasida bog‘liqlik ko‘rdim.

Masalan, dunyoning eng kuchli armiyasi AQShniki ekan. AQShda paxta ekiladi. Uchinchi kuchlisi Xitoy ekan, xitoylarning ham paxtasi bor. Kuchli armiyalarga ega Turkiya, Isroil, Hindiston, Pokiston, Misr, xullas, ancha-munchasi paxta ekadi.

Endi ulardagi askarlar ham O‘zbekiston harbiylari kabi paxta dalasida toblanadimi yoki yo‘qmi, shunga oydinlik kiritishimiz kerak.

O‘shanda paxta terimi va armiya kuchi o‘rtasidagi bog‘liqlikning sirini ochish mumkin bo‘ladi. A, labbay!

Qitmir Askar
Eltuz.com

Tag‘in o‘qing
5 avgust 2019
Haydovchilarni qayta tayyorlash va bu haqda sertifikat berish tizimini to‘laligicha monopoliya qilib olgan “Avtotest Report” MChJning kutilmaganda “o‘yindan chiqishi”ni ...
18 fevral 2017
“Oila va jamiyat” gazetasi (15.02) bugun o‘zbek jamiyatining og‘riqli nuqtasi – ayollarning xorijga chiqib ketayotgani masalasiga bag‘ishlangan maqola chop ...
23 may 2018
O‘zbekistonda 2017 yilgi paxta yig‘im-terimi mavsumida bolalar mehnatidan foydalanish juda sezilarli darajada kamayganiga qaramay, majburiy mehnatdan foydalanish ko‘lami kengligicha ...
21 noyabr 2016
Rassom Tuz o‘zining navbatdagi karikaturasida Shavkat Mirziyoevga yordam so‘rab murojaat qilayotgan o‘zbek yoshlari zehniyatiga nazar tashlaydi. Bosh vazir virtual ...
Bloglar
2 iyul 2020
6-sinfda o‘qirdim, Kampuchiyada davlat to‘ntarishi bo‘lib hukumatga Pol Pot rahbarligidagi “Qizil kxmerlar” kelganini, ular butun ...
25 iyun 2020
​​Xalqaro press-klubda matbuot anjumani bo‘lib o‘tibdi, unda Inson huquqlari bo‘yicha Milliy markaz direktori Akmal Saidov ...
21 iyun 2020
(bo‘lgan voqea) Tarjimon sifatida Rossiyaning militsiya bo‘limlaridan biriga chaqirishgan edi. Bo‘limda jinoyatchi sifatida gumon qilingan ...