Ozod odamlar orasida

Bu savolni qo‘yishimga sabab, ba'zi o‘zbekdan chiqqan «dono»larning Rossiyaga ish izlab borayotgan hamyurtlarimizga surbetlarcha shu tamg‘ani yopishtirayotgani bo‘ldi.

Aslida ish izlab chiqqanlarning ko‘pi tobe bo‘lmaslik uchun chet elga chiqqan. Ko‘plarida oliy ma'lumot bor, ammo xohlamaydi korruptsiya botqog‘iga botgan, qonxo‘r tuzumga xizmat qilishni.

Paxta mavsumida majburan dalaga haydalsa, boshqa paytlar ko‘cha yig‘ishtirish, obodonlashtirish ishlariga, aholidan har-xil to‘lovlrni yig‘ishga majburan jalb etilsa.

Maoshi plastik kartaga o‘tkazilsayu, naqd pulga almashtirish uchun yigirma-o‘ttiz foiz pora bersa, yana kamiga har-xil tadbirlarga deb ushlab qolinsa.

Eng asosiysi shuncha adolatsizliklar bo‘lsada o‘z noroziligingni bildira olmasang, ikki gapni birida hukumatdan minnatdorligingni izhor qilib tursang (ehtiyot shart, «quloq» ko‘p).

Endi adolat yuzasidan aytinglarchi kim qul, kim mute?! O‘z jismoniy kuchiga tayanib, bo‘lmag‘ur mafkuradan fikran, ruhan ozod bo‘lgan odamlarmi?! Yoki erta-indin paxta terimiga majburan haydaladiganlarmi?!

Akmal Nabiev,
www.eltuz.com