Bosh muharrir hokim jurnalistlarning og‘zini moylab turishi bilan maqtandi

«Hurriyat» gazetasida (21.12) bosma nashrlar haqida chop etilgan maqola sarlavhasini o‘qib, unda dolzarb masala ko‘tarilgan ekan, deb o‘ylashingiz mumkin.

«Rasmiy gazetalar o‘z obunachilarini topa olmaydimi?» sarlavhali bu maqola «Ba'zida odamlar o‘rtasida «Rasmiy gazetalar qiziqarli emas», degan fikrlarga guvoh bo‘lamiz», deya boshlanadi.

Ammo maqola davomida sarlavhaga chiqarilgan savolga javob topaman deb ovora bo‘lmang. Chunki uni o‘qiganingiz sari maqola muallifi, «Qiziltepa tongi» gazetasi bosh muharriri aslida bu niyatda qog‘oz qoralamagani oydinlashib boraveradi.

Buning o‘rniga, u o‘z gazetasining xaridorgirligi, xalqni qiziqtiradigan mavzularni yoritayotganiga e'tibor qaratib, mohiyatan o‘zini maqtashga o‘tib ketadi.

Maqtanish jarayonida muallif tuman hokimi har yili mustaqillik arafasida maxsus tadbir o‘tkazib, jurnalistlarning og‘zini moylab turishini bildirib qo‘yadi.

Bu e'tirofni o‘qiganingizdan keyin nega jurnalistlar amaldorlarni tanqid qilishga jur'at eta olmasligini anglaganday bo‘lasiz.

Chunki hokim har yili jurnalistlarni «faxriy yorliq, qimmatbaho sovg‘alar» bilan taqdirlab turgandan keyin uni tanqid qilib bo‘ladimi?!

Yegan og‘iz uyaladi-ku axir!

Bahodir Sharif
O‘zbekistonlik gazetxon tahallusi
Eltuz.com