Shoir Tursunboy Adashboev vafot etdi

12 may kuni Toshkentda atoqli o‘zbek shoiri Tursunboy Adashboev yurak hurujidan vafot etdi.

Tursunboy Adashboev 1939 yil 1 yanvarida O‘sh viloyatiga qarashli Olabuqa tumanida tug‘ilgan. Toshkent Davlat universiteti hamda Moskvadagi Adabiyot institutini bitirgan.

76 yoshli adib ham Qirg‘iziston, ham O‘zbekistonda bolalar shoiri degan nom qozondi.

Shoirning «Kamolning olmasi» deb nomlangan ilk kitobi 1967 yil chop etilgan.

Keyinchalik uning «Biz, sayohatchilar» (1969), «Arslonbobo sharsharasi» (1973), «Surnay» (1975), «Nurdaryo» (1977), «Guldasta» (1979), «Olatog‘ – lolatog‘» (1982), «Oqbura to‘lqinlari» (1985), «Sovg‘a» (1987), 1989-1990 yillarda uning «Arslonbobo afsonasi», «Sichqonning orzusi», «Uch bo‘taloq va sirli qovoq» to‘plamlari bosilgan.

Marhumning janoza marosimi 13 may kuni Toshkentda, O‘zbekiston vaqti bilan 10 da bo‘lishi aytilmoqda.

Eltuz nashri tahririyati shoirning oila a'zolariga, yaqinlari va muxlislariga o‘z ta'ziyasini bildiradi.

Eltuz.com