O‘qituvchilar endi baklashka yig‘ishmoqda

Farg‘ona viloyatining barcha tumanlaridagi aksariyat maktablarning o‘qituvchilari baklashka (salqin ichimliklardan bo‘shagan yelim idish) yig‘ishga majburlanmoqda.

«Bizning maktabimizga bir kunda 450 ta baklashka yig‘ish topshirildi», – deydi Eltuz muxbiri bilan suhbatda Buvayda tumanidagi maktablardan birining direktori.

Lekin ayni shu issiq kunlarda baklashka topish qiyin. Chunki ba'zi kishilar bo‘sh baklashkalarni yig‘ib, uni yuvib-tozalab gazsuv sotadiganlarga pullamoqda. Ba'zi maktab o‘quvchilari esa pul topish maqsadida sovuq choyni shunday baklashkalarga quyib bozorlarda, avtostantsiyalarda sotmoqda.

«Yig‘ilgan baklashkalarni tumandagi selxozximiya degan tashkilotga ya'ni qishloq xo‘jaligi ekinlarini zararkunandalardan himoya qiluvchi qishloqxo‘jalik kimyo tashkilotiga topshirib kelayapmiz», – deb so‘zlarini davom ettirdi suhbatdosh.

Bu baklashkalardan g‘o‘zaga tushgan qurt uchun qopqon sifatida foydalanilmoqda.

Baklashkani necha kun yig‘ish, umumiy norma nechta bo‘lishi haqida direktor bilmasligini aytdi. Chunki bu kabi jamoat topshiriqlarining aniq vaqti, belgilangan me'yori yo‘qligiga barcha ko‘nikib qolgan.

O‘tgan yili, o‘qituvchi va shifokorlar ko‘sak qurtini qo‘lda terib olishga safarbar qilingan edi.

Nasima Davron qizi
Eltuz.com