Suv xo‘jaligi idorasining 20 milliardlik tanlovsiz qurilish shartnomasi

Suv xo‘jaligi vazirligi huzuridagi «Suv xo‘jaligida kapital qurilish loyihalarini amalga oshirish agentligi»ning «Toshkent suv qurilish invest» davlat muassasasi hech qanday tender va tanlovlar o‘tkazmay, Ohangaron tumanida 2 ta ko‘tarmali nasos agregati o‘rnatish hamda lotok tarmoqlarini rekonstruktsiya qilish bo‘yicha «GOLD PRINT MASTER» MChJ bilan to‘g‘ridan-to‘g‘ri shartnoma tuzgan.

Shartnomaning umumiy qiymati qariyb 20 mlrd so‘mni tashkil etadi.

Ochiq ma'lumotlarga ko‘ra, «GOLD PRINT MASTER» MChJning sohaviy qurilish-pudrat tashkilotlari (umumqurilish-ijtimoiy ob'ektlar) bo‘yicha reyting bahosi — DDD, ya'ni 1-quyi daraja. Korxonaning ustav fondi 3,5 mln so‘m deb ko‘rsatilgan.

Shuningdek, mazkur korxona to‘g‘risidagi ma'lumotlar Melioratsiya va irrigatsiya reytingida topilmadi. Aftidan bunday qurilish ishlari bo‘yicha avval hech qanday buyurtma olmagan va bajarmagan. Qurilish ishlarini amalga oshirish uchun korxonada hech qanday maxsus transport vositalariga ega emas.

PS. Suv xo‘jaligi vazirligi tizimidagi davlat muassasi qanday mezon va o‘lchovlar asosida mazkur korxonaga yirik qurilish ob'ektini ishonib topshirganligi haqida ochiq manbalarda birorta ma'lumot yo‘q.