41 o‘zbek to‘nglab qolgan avtobusdan qutqarildi

52 kishining hayotiga nuqta qo‘ygan avtobusdagi yong‘indan 4 kun o‘tib o‘zbekistonlik muhojirlar yana qozoq dashtlarida muammoga duch keldi. 41 o‘zbekistonlik Qozog‘istonda muzlab qolgan avtobusdan qutqarildi. Tengrinyus xabar agentligiga ko‘ra¸ 22 yanvarga o‘tar kechasi Petropavlovsk – Sariog‘och yo‘nalishida ketayotgan va ichida O‘zbekistonning 41 vatandoshi bo‘lgan avtobus yonilg‘i tizimi muzlagani oqibatida yo‘lda to‘xtab qolgan.

Xabarda aytilishicha¸ kulfatda qolgan o‘zbek yo‘lovchilar politsiya va qutqaruv xizmati tarafidan qutqarilgan.

O‘zbekistondagi nochor hayot va ishsizlik bois yo‘lga chiqib sovuqda qolgan 41 nafar o‘zbek Bo‘zayg‘ir qishlog‘idagi maktabga joylashtirilgan.

Qozoq dashtlarida o‘zbeklar tushgan avtobuslar bilan bog‘liq noxush voqealar uchrab turadi. Ulardan eng dahshatlisi 18 yanvar kuni Oqto‘ba viloyatida ro‘y bergan edi. Avtobus ichidagi yong‘inda 52 o‘zbekistonlik kuyib kulga aylangandi.

Avtobusda yonib o‘lganlar voqeasidan hulosa chiqarmagan vatandoshlarning yana eski avtobuslar bilan Rossiyaga ketishini rassom KIRPI bizga yo‘llagan karikaturasida tasvirladi. Kirpi chizgan rasmdagi yigit ota-onasining qarshiligiga qaramay, “Baribir Rossiyaga ketaman, bu qashshoqlikda yashaganimdan ko‘ra avtobusda yonib ketganim afzal”, deb baqirmoqda.

Rassom Kirpi
Eltuz.com