MXX kuratorlari masjidni tark etdimi?

Prezident Mirziyoevning Milliy xavfsizlik xizmatini keskin tanqidlar qilgani ortidan masjidlardagi MXX xodimlari faoliyati ham cheklana boshlandi.

O‘zbekiston Musulmonlari idorasi raisi o‘rinbosari Aydarbek Tulepov 17 fevral kuni o‘z arizasiga ko‘ra ishdan olindi.

Diniy idorada ishlovchi xodimning «Eltuz»ga bildirishicha, Aydarbek Tulepov u yerda MXX vakili sifatida ishlab kelgan.

Tag‘in uning bildirishicha, MXX kuratorlarining masjidlardagi faoliyati ham vaqtincha to‘xtatilgan.

Bu xabarlar prezident Mirziyoevning keskin tanqidi va MXX tarkibini qisqartirish tadbirlari ortidan paydo bo‘ldi.

«…Pogon kiygan noinsoflarga birorta davlatda unday vakolat berilmaydi. 37-yilda ham bunday (emas) edi», dedi prezident MXXning mislsiz hokimiyatga ega bo‘lganiga ishora qilib.

Bunga qadar MXXning Korruptsiya va uyushgan jinoyatchilikka qarshi kurashish boshqarmasi butunlay tugatilgan.

MXX raisi Rustam Inoyatov ishdan olingan. Uning o‘rniga ilgari MXX tizimida ishlamagan Ixtiyor Abdullaev tayinlangandi.

Undan ham ilgari MXXning viloyatlardagi 11 nafar rahbari va bir qancha generallari ishdan haydalgan edi.

O‘zining navbatdagi hajviy suratida Rassom Kirpi diniy ulamolar bo‘ynidagi MXX tizginini bo‘shatishga urinayotgan mamlakat prezidentini aks ettiradi.

Rassom Kirpi
Eltuz.com