Toshkentning qadimiy qismini buzishib, beton uy qurib sotishmoqchi

Toshkentning Mirobod tumanida joylashgan Lolazor mahallasidagi tarixiy binolarning yiqilishi va ular o‘rnida ko‘p qavatli uylar qurilishi haqida uy egalariga 3 fevral kuni ma'lum qilindi.

Bu haqda maqola chop qilgan «Farg‘ona» axborot agentligiga ko‘ra, qurilish loyihasi prezidentning 5511-farmoni asosida «toshkentlik va Moskvadan kelgan» loyihalash shirkatlari tomonidan tayyorlangan.

Yana ham aniqrog‘i, qurilish faoliyati bilan shug‘ullanishga shu yildan (2019) izn berilgan, ilgari isitish uskunalari savdosi bilan shug‘ullanib kelgan Muhandis-konsalting shirkati bu ishlar bilan shug‘ullanmoqda.

Toshkent markazidagi buzilishi kutilayotgan uylar, maqola muallifiga ko‘ra, Nikolay podsho davrida – 1891-1917 yillarda qurilgan va Toshkent zilzilasi ham ta'sir qilmagan tarixiy binolardir.

Bundan avval Open Democracy tashkiloti jurnalistlari o‘z surishtiruvida Tashkent City, Akfa Dream World, Akfa Group loyihalari Toshkent shahri hokimi Jahongir Ortiqxo‘jaevga tegishli ekanini ochiqlagan edi.

31 yanvar kuni shahar hokimi jurnalistlarga bergan matbuot anjumanida bu ma'lumotlarni qisman tasdiqlab,
«Bu (Akfa shirkati) mening 20 yillik kompaniyam, o‘zim yaratganman. Men hokim bo‘lganim bilan uni tashlab ketmayman», degan edi.

Rassom Tuz
Eltuz.com