Kichik Karimov: Aslida katta o‘g‘rilar bugun hokimiyat tepasida

Gulnora Karimovaning o‘g‘li Islom Karimov Bi Bi Si muxbiriga bergan intervyusida bobosidan keyin hukumatga kelganlarni aybladi.

Marhum prezidentning arzandasi onasi Gulnorani oqlashga harakat qilarkan, bugun hukumat tepasiga kelganlarning 2-3-4 milliardlik o‘g‘irliklari borligini aytdi.

U shuningdek, hukumatdagi har bir vazir, kuch tizimidagi amaldorlar yuzasidan hujjat to‘plashayotganini bildirdi.

Yarim soatlik intervyusida Bi Bi Si jurnalisti Ibrat Safo Islom Karimovga mavzuni eslatib, oyisining mablag‘lari, uylari, mashinalariga oid keskin savollar berdi.

Karimovning bildirishicha, bu mulklar qisman bobosining sovg‘asi, shuningdek bugungi mulozimlarning prezidentning qiziga «hadyalari»dir.

U ayni paytda bobosi yaratgan tizimning bugun ham ishlayotganini aytdi.

«Nega hech kim Beverli Xillsdagi 50 million, 80 million turadigan uylarni so‘ramaydiyu, mana bu 10 millionlik uyni so‘rashadi», dedi Karimov, xolasi Lolaning Kaliforniyadagi qasriga ishora qilib.

Shuningdek u, onasiga qarshi ko‘rgazma berayotganlarni sudga tortish rejasini ochiqladi.

Eltuz nashri Karimovning ayni shu iddaolarini bir minutlik videoga jamladi.

Eltuz.com