Asosiy mavzular
11 noyabr 2017

«Jasliq» mahkumining onasi o‘g‘lini BMT vakilidan yashirishganini aytmoqda

Jizzaxlik Mahkam Jo‘raeva 18 oktyabr kuni «Jasliq» qamoqxonasida jazo muddatini o‘tayotgan o‘g‘li Furqat Jo‘raevni ko‘rgani borganida uni BMTning inson huquqlari bo‘yicha vakili Ahmad Shahiddan yashirishganini eshitganini bildirdi.

Uning aytishicha, «Jasliq» koloniyasida bo‘lgan jami 19 nafar mahkum BMT komissiyasi kelishi arafasida Toshkentga etap qilingan.

Jizzaxlik 35 yoshli Furqat Jo‘raev 2015 yilning 3 sentyabr kuni viloyatning Paxtakor shahridagi bozor oldidan niqobli kimsalar tomonidan o‘g‘irlab ketilgan edi.

Oradan bir kun o‘tgach esa uning do‘stlari Aramais Avakyan, Bektemir Umrzoqov, Akmal Matmurodov va Dilshod Alimov ham kuppa-kunduz kuni niqoblilar tomonidan o‘g‘irlangan va oradan 40 kun o‘tgach, bu beshovlonning Milliy xavfsizlik xizmati viloyat boshqarmasi hibsxonasida saqlanayotgani ma'lum bo‘lgandi.

Hibsga olinganlar qisqa vaqt ichida O‘zbekiston Jinoyat kodeksining “Konstitutsion tuzumga tajovuz”, “Qo‘poruvchilik”, “Taqiqlangan tashkilotlar tuzish va ularga a'zolik” kabi og‘ir moddalari bilan sudga tortilgandi.

Sud majlislarida bu besh yigit ayblovlarni tan olmagan. Tergov davrida o‘ta noinsoniy qiynoqlarga tutilganliklarini bildirishgan. Sud ularni turli muddatlarga ozodlikdan mahrum qilgandi.

Mazkur ishning noinsoniy qiynoqlar bilan o‘tgan tergov jarayoni va adolatsiz mahkamasi “Aramais Avakyan ishi” nomi bilan Amerika va Yevropadagi yetakchi inson haqlari tashkilotlari va bir qator siyosatchilarning, shuningdek, dunyo armanlari xalqaro tashkilotlarining e'tiboriga tushdi.

12 yillik qamoq jazosiga hukm qilingan Furqat Jo‘raev 2016 yilning 9 aprelidan buyon O‘zbekistondagi eng og‘ir sharoitli “Jasliq” qamoqxonasida jazo muddatini o‘tayapti.

O‘g‘lining nohaq ayblanganligini isbotlash uchun ikki yil davomida harakat qilib kelayotgan ona uning «Jasliq» qamoqxonasida ham muttasil qiynoqqa solinganini aytadi.

Mahkam Jo‘raevaning so‘zlariga ko‘ra, qiynoqlar tufayli o‘g‘li jiddiy jismoniy jarohatlar olgan.

Mahkam Jo‘raeva qamoqdagi o‘g‘lining hayoti xavf ostida ekanini aytar ekan, videomurojaatida O‘zbekiston prezidenti Shavkat Mirziyoevdan nohaq qamalganlar qatorida o‘g‘li Furqat Jo‘raevning ham ozod etilishini iltimos qiladi.

Ulug‘bek Ashur
Eltuz.com

Tag‘in o‘qing
15 avgust 2017
Paxta koalitsiyasi Jahon bankiga O‘zbekistonda majburiy mehnat to‘xtamayotgani borasida o‘z havotirini bildirib keladi. «Majburiy mehnatga barham berilmaguniga qadar, Jaxon ...
29 avgust 2018
26 avgust kuni efirga ketgan «Munosabat» ko‘rsatuvi ishtirok etgan Politexnika universiteti o‘qituvchisi Abdullaeva Anjelika hech kimga so‘z bermay «ma'naviyat» ...
13 mart 2019
G‘ayrat Bobojonov 50 yoshda. Shundan 25 yilini jurnalistikaga bag‘ishladi. Jurnalistik faoliyatini O‘zbekiston tarixidagi ilk mustaqil telekanalda 1994 yili boshlagan ...
8 noyabr 2017
8 noyabr kuni Andijon shahri rastalarida bir kilo mol go‘shti narxi 36 ming so‘mga ko‘tarildi. Andijondagi «Eski shahar» va ...
Bloglar
20 iyun 2022
1990 yil 20 iyunda O‘zbekiston SSR Oliy Soveti tomonidan Mustaqillik deklaratsiyasi qabul qilingan edi. Mamlakat ...
17 iyun 2022
Biz nima uchun o‘zbek jamiyatida «ayollar huquqi» deb gapiramiz va bu ko‘pchilikka yoqmaydi?Buning sabablarini bilish ...
7 iyun 2022
(Taniqli shoir va siyosatchi Muhammad Solihning “Imperativ” kitobidan 54-qism. Audiokitob matnini muallifning o‘zi o‘qigan) AMAL ...