Кетмонов ўзига овоз берди

4 декабр кунги сайловда қатнашган Халқ Демократик Партиясидан номзод Хатамжон Кетмонов сайловда қатнашиб ўзига овоз берганини матбуотга айтди.

«Адолат» партиясининг вакили Наримон Умаров ҳам ўзига овоз берганини билдирди.

Фақат Миллий Тикланиш партиясининг номзоди бу саволни очиқ қолдирди.

Сайловда Бош вазир номзоди учун курашаётган ЎзЛиДЕП партияси фаолларидан ташқари, унга муқобил номзодни илгари сурган бошқа партия вакиллари ҳам Шавкат Мирзиёев номзоди тарғиботи билан шуғулланишгани маълум бўлди.

«Миллий тикланиш» партиясининг фаолларидан бири шоира Саломат Вафо ҳам Шавкат Мирзиеевга овоз берганини ошкора қилди.

Ижтимоий тармоқда сайлов куни хитга айланган видеотасвирлар пайдо бўлди. Бунда бир гурух аёллар, жўшқин бир қўшиқ мотивига рақсга тушишади. Бу видео қаерда ва қачон олингани бизга маълум эмас, бироқ байрам қилаётган аёллар рақси фонида куйлаётган ўзбек хонандаси қўшиғи сатрлари жуда таъсирли.

Очилар экан тош, ёрилар экан бош
Ёлғиз ҳиёнатнинг дастидан
Ёлғони бўлиб фош, кўзимдан оқар ёш
Ёлғиз ҳиёнатнинг дастидан
Фақат уни сайлаб, ҳаммадан авайлаб
Жуда-жуда қаттиқ адашдим
Оқарди сочим, ёрилди бошим
Жуда-жуда қаттиқ адаш-ди-им!

Ижтимоий тармоқда шунингдек, халқ орасида криминал авторитет сифатида танилган Ўзбекистон Миллий спорт кураши федерацияси президенти  Салим Абдувалиевнинг Шавкат Мирзиёев акси туширилган футболка кийган расмлари пайдо бўлди.

Сайлов участкалари яқинида Шавкат Мирзиёев расми ва унинг тагида қора ҳарфлар билан «Мой президент» деган ёзув ёзилган оқ футболкалар сотилган.

Участкаларда, сайловчиларга шунингдек гул ва конституция тарқатилгани ҳам Шавкат Мирзиёевнинг қай йўл билан ҳукумат тепасига келганини эсга солади.

Эслатиб ўтамиз, халқаро тамойилларга кўра, мамлакатда эркин матбуот ва реал сиёсий мухолифат бўлган тақдирдагина сайловлар эркин ва адолатли ўтган ҳисобланади…

Видеонинг Youtube каналидаги линки: https://youtu.be/TcTiAIeuS9I
Eltuz.com