Дайжест
6 октябр 2016

“Сирли” номзодлар учун имзо йиғилмоқда

Айни кунларда 4 декабрда бўлиб ўтадиган Ўзбекистон президенти сайловига иштирок этиши кутилаётган номзодлар учун сайловчилар имзосини тўплаш жараёни бормоқда.

Партияларнинг расмий газеталари бу жараён “фаоллик ва уюшқоқлик” билан ўтказилаётгани ҳамда тез кунларда якунланишини ёзаётир.

rasm1890
Президентликка “сирли” номзодлар. Рассом: Кирпи

“Миллий тикланиш” газетаси (05.10) шу номдаги демократик партиянинг барча бўғиндаги ташкилотлари имзо тўплашни “қонунчиликда белгиланган тартибда” ва “юқори савияда” ўтказаётганини билдирди.

“Сайловчилар имзосини белгиланган тартиб ва миқдорда тўплаш партиямизнинг ушбу сиёсий жараёнда ўз номзоди билан иштирок этишини таъминлайди”, дейилади газетада.

Халқ демократик партияси нашри бўлмиш “Ўзбекистон овози” газетаси (04.10) ҳам имзо тўплаш жараёни якунланаётганини айтар экан, “имзо тўплаётган шахс томонидан сайловчиларни мажбур қилиш ва уларни оғдириб олишнинг ҳар қандай шакли қонунда белгиланган жавобгарликка сабаб бўлиши”ни эслатиб ўтади.

Газеталар партиялар имзо тўплашда уларнинг аъзолари қанчалик фаоллик кўрсатаётганини ёзмасин, бу жараёнда Ўзбекистондек “демократик ва ҳуқуқий давлатларга” хос қусур – маъмурий босимдан фойдаланилаётганини кўриш мумкин.

Яъни шу кунларда маҳалла ва қишлоқ фуқаролар йиғинларига иши тушганлардан, аввало, бирор партия номзоди учун имзо варақасини тўлдириш сўралаётир. Албатта, варақани тўлдириш ихтиёрий-мажбурий кўринишдадир.

Газеталарда эътибор қаратиш мумкин бўлган яна бир жиҳат шуки, сайлов жараёнига тааллуқли бирорта мақолада партиялардан кўрсатилиши кутилаётган номзодларнинг номи йўқ.

Масалан, “Миллий тикланиш” газетасида сайлов мавзусида бештадан ортиқ мақола берилган бўлса-да, “Миллий тикланиш” партиясидан президентликка кўрсатилаётган номзод исми сирлилигича қолган. ХДП ҳақида ҳам шу гапни айтиш мумкин.

Бу “сирли шахслар”нинг номи газеталарда фалон “партиядан Ўзбекистон президентлигига кўрсатиладиган номзод” шаклида берилмоқда.

Албатта, ўзбекистонлик ҳозиржавоблар партияларнинг бундай “камтар”лигини сайловолди сиёсий тактикасига йўйиши ҳеч гап эмас. Лекин одатда демократик жамиятларда сайловга шундай ҳам кам вақт қолганда бундай сиёсий тактикадан фойдаланилмайди.

Илгари тўйларда катта товоққа чиқадиган, яъни энг йирик совринга даъвогар кучли полвонни омма кўзидан яшириб туриш одати бўларди. Балки партиялар ҳам “катта полвон” номини шунинг учун газеталари орқали билдирмаётгандир?! Ёки аввалроқ номини айтиб қўйса, кўз тегишидан чўчишяптимикин!?

Баҳодир Шариф
Ўзбекистонлик газетхон таҳаллуси
Eltuz.com

Тағин ўқинг
5 август 2019
Ўзбекистон президенти Шавкат Мирзиёев сўнгги вақтларда халқнинг чексиз ғазабига дучор бўлаётган буз-бузларда ўзининг айби йўқлигини билдирди.  Давлат раҳбари уй-жойлар ...
3 сентябр 2017
Паҳлавон Содиқ 1973 йилда Наманган вилоятининг Чортоқ шаҳрида туғилган. Тошкент ва Туркияда журналистикадан таҳсил олган. «Руҳият насими» (1994) шеърий ...
31 май 2017
19 май куни президент Мирзиёев Бухорода эркин сайёҳлик зонасини яратиш қарорини тасдиқлади. 2980-сонли қарорга кўра, Ўзбекистон Миллий банки масъул ...
18 январ 2016
Тошкент ҳукумати АҚШ ва Европа ҳуқуқ тизимлари Гулнора Каримованинг коррупция ва пул ювиш жиноятларига алоқадорлик гумони билан музлатиб қўйилган ...
Блоглар
17 феврал 2020
Ўзбекистонда тобора оммавийлик касб этаётган, “президент ташаббуси” билан ташкил этилаётган кластерлар пахтани қўшиб ёзишнинг олдинги ...
13 феврал 2020
Сиёсатшунос Рафиқ Сайфулин Ислом Каримов режимининг етакчи тарғиботчиларидан бири эди. Бугун у ватанга хоинликда айбланяпти.  ...
6 феврал 2020
Марказий Осиё давлатларига паст назар билан қарашини яширмайдиган Россия либерал демократик партияси лидери Владимир Жириновский ...