Дайжест
28 январ 2016

Лоланинг нияти, “овга чиққан” камолотчилар ва одам ёққан дўкондор

Президентликни хоҳламасангиз, биринчи хонимликка нима дейсиз?

Sputnik интернет нашри Ўзбекистон президентининг кенжа қизи Лола Каримова Instagram даги расмий саҳифасида келажакда давлат раҳбари бўлиш нияти йўқлигини маълум қилгани ҳақида ёзди.

Айтилишича, Лола давлат бошқарув органларида фаолият юритишни, давлат арбоби бўлишни хоҳламайди.

Лола Каримова сўнгги вақтларда интернетда эри Тимур Тиллаевнинг баъзи гуруҳлар томонидан Ўзбекистон президенти лавозимига тайёрланаётгани тўғрисидаги миш-мишларга, демакки ўзининг мамлакатнинг биринчи хоними бўлишга муносабатини очиқламаган.

ТИВнинг “тезкор”лигига куласизми, куясизми?

“Жаҳон” ахборот агентлиги Ўзбекистон Ташқи ишлар вазирлигининг КХДРда навбатдаги ядро синовлари ўтказилгани расмий Тошкентда ташвиш билан қабул қилингани ҳақидаги баёнотини тарқатди.

Унда айтилишича, Ўзбекистон “Пхеньянни кескинлик кучайишига олиб борадиган ҳамда минтақадаги ва умуман, дунёдаги хавфсизликка тўғридан-тўғри таҳлика ҳисобланадиган бузғунчилик ҳаракатларини тўхтатишга чақиради”.

КХДР водород бомбасини синовдан ўтказганини шу йилнинг 6 январида эълон қилганини, дунёнинг аксарият давлатлари бунга муносабатини бир-икки кун ичида билдирганини ҳисобга олсак, Ўзбекистон ТИВнинг “кучукнинг кейинги оёғи” бўлишини қандай баҳолайсиз?

Мухолифатчилик кайфияти даҳшатли ҳодисами?

“Ҳуррият” газетаси яна ижтимоий тармоқлар ва “оммавий маданият” ваҳимаси мавзусини кўтаради.

“Телеграмм, Одноклассники, Твиттир, Вконтакте, Whats up, Facebook, Viber ва бошқа ижтимоий тармоқлар…дан диний ақидапарастлик, мухолифатчилик кайфияти, ахлоқий бузуқликларнинг жуда ёрқин талқин этилаётгани даҳшатли ҳодисадир”, дея хулоса қилади газета.
“Интернет ҳам бугун номи тез-тез тилга олинаётган маданиятсизликнинг, “оммавий маданият”нинг бир бўлагидир”, дейди газета.

“Камолотчилар” овга чиқади

Sputnik интернет нашрининг билдиришича, “Камолот” ёшлар ижтимоий ҳаракати вояга етмаганларнинг дарс вақтларида ва тунги вақтларда интернет кафеларда бўлиши олдини олиш учун махсус гуруҳлар ташкил этган. Бу гуруҳлар тизимли равишда рейдлар уюштиради.
“Биз у ерда нафақат дарс қолдираётган ўқувчилар борлигини, балки компьютерларда нималар сақланаётганини ҳам текширамиз”, деган ёшлар ташкилоти вакили.

ЎзА ёлғонни ошкор қилиб қўйдими?

Сўнгги кунларда Ўзбекистон Миллий ахборот агентлиги – ЎзА мамлакат вилоятларида йил якунларига бағишланган фаоллар йиғилишлари ҳақида хабарлар тарқатяпти.

Наманганда ўтган шундай йиғилиш тўғрисидаги хабарда вилоятда қўлга киритилган сон-саноқсиз муваффақиятлар қаторида саноат маҳсулотлари ишлаб чиқариш ҳажми ҳам 14 фоиз ўсгани айтилади.

Кейинги ўринларда агентлик вилоятдаги йирик корхоналарнинг 30 фоизида саноат ишлаб чиқаришида пасайиш кузатилганини ёзади. Биргина Наманган шаҳридаги 7 корхонада саноат маҳсулотлари ишлаб чиқариш ҳажми 24 миллиард сўмга камайган. Бундай ҳолат Норин, Поп, Чортоқ, Чуст туманларида ҳам қайд этилган.

Агар шу гап рост бўлса, ялпи ҳудудий маҳсулотда саноат ишлаб чиқариш ҳажми 14 фоиз ўсгани ёлғон бўлиб чиқмайдими? Чунки энг йирик, демакки асосий ишлаб чиқарувчи корхоналар тузук ишламаётган бўлса, ўсиш қаердан бўлсин!?
Агентлик бошқа вилоятлардаги фаоллар йиғилишлари ҳақидаги хабарларида яна ҳушёрликни қўлга олиб, юқоридаги каби рақамлардан қочади ва “йўл қўйилган баъзи камчиликлар” билан чекланади.

300 минг сўм учун одам ёққан дўкондор

“Ҳуқуқ” газетасининг ёзишича, Самарқанд вилоятининг Иштихон туманилик дўкондор ўз дўконидаги савдодан тушган 300 минг сўм йўқолгани учун қотилликка қўл урган. У бу ишда ўзи гумонлаган шахсни уйидан чақириб олиб, аввал роса калтаклаган. Гумонланувчи ўғирликни бўйнига олмаганидан кейин уни дарахтга боғлаб, тагига ўтин тахлаган ва ёқиб юборган. Жарбланувчи шифохонага олиб борилгандан сўнг куйиш натижасида олган жароҳатлардан вафот этган. Қотил 18 йилга озодликдан маҳрум этилган.

Еltuz.com

Тағин ўқинг
17 июл 2018
64 ёшли собиқ сиёсий маҳбус Муҳаммад Бекжон 16 июль куни АҚШнинг Сиэтл шаҳрида оиласи, фарзандлари ва набиралари билан учрашди. ...
18 август 2018
Ҳозирда АҚШ бўйлаб саёҳат қилаётган, кўпчиликка “Алвидо, Жаслиқ!” китоби билан машҳур собиқ сиёсий махбус Муҳаммад Бекжон “Элтуз” нашри ўқувчилари ...
23 март 2016
Вазирлик вакилининг айтишича, иш берувчи ходимдан унинг хизмат вазифаларига кирмайдиган ишларнинг бажарилишини талаб қилиш ҳуқуқига эга эмас. Бундан ташқари, ...
17 феврал 2016
Бундан илгари Каниза (Aҳмeдoвa Шaҳризoдa Фaрҳoдoвнa) ўзининг Porsche Cayenne машинасининг ойнаси синдирилгани, қимматбаҳо 12000 долларлик Vertu мобил телефони ўғирланганидан ...
Блоглар
16 октябр 2019
Қўшиқчи Жаҳонгир Отажоновнинг икки кун олдин олиб қўйилган ижодий фаолият учун лицензиясини «Ўзбекконцерт» 16 октябрь ...
7 октябр 2019
Мен 10 кунлик қамоқдан уйга келган заҳотим интервью берганимда Шабнамнинг тақдиридан мутлақо бехабар эдим. Менинг ...
7 октябр 2019
Мажбуран руҳий касалликлар шифохонасига ётқизилган хоразмлик блогер Нафосат (Шабнам) Оллошукурованинг отаси Болтабой Оллошукуров қизининг соғлом ...