Асосий мавзулар
20 сентябр 2019

Жосусликда айбланган сурхондарёлик оила адолат изламоқда

2013 йилнинг 2 майида Термиздаги қурилиш фирмаси раҳбари бўлган 60 яшар Абдуғани Эрдонов ўз машинасида қурувчиларига овқат олиб кетмоқда эди. Йўлда уни ДАН ходими тўхтатади ва ундан сал нарида турган «Нексия»га ўтиришини сўрайди. У бегона машинага ўтиргач, бошига зарба беришади. Абдуғани ҳушидан кетади. Шу кундан бошлаб Абдуғани Эрдонов ҳамма нарсасини – эркинлигини, оиласини, соғлиғини ва қонунга бўлган ишончини йўқотади.

«Отамни ва оиламизнинг 12 аъзосини 2013 йили Тожикистон фойдасига жосуслик ва диверсияда айблаб суд қилишди. Отамни калтаклашди, натижада у кўриш қобилиятини йўқотди. Қамоқнинг дастлабки кунлари уни аллақандай хусусий уйда сақлашди. Бу ИВС ёки СИЗО эмас эди. У ерга МХХ ходимлари келиб, то жиноятларни ўз бўйнига олмагунча отамни қийнашар эди. Бу жиноятларни у ёки бизнинг оиламиздан бирор киши содир этмаган. Бу аввал бошидан уйдирма иш эди. Буни Сурхондарё вилояти МХХ раҳбари бўлган Нодир Тўрақуловнинг ўзи ўйлаб топган бўлса керак», дейди Раҳмонали Эрдонов «Элтуз» нашрига берган интервьюсида.

Эрдоновлар оиласининг 12 нафар аъзоси устидан очилган жиноят ишига МХХ Сурхондарё вилояти бошқармаси тергов бўлими бошлиғи Нодир Тўрақулов раҳбарлик қилган эди.

Тўрақулов бу оилани буткул яксон этиш учун ҳамма ишни қилди ва у қилган шафқатсизликлар одамни ҳайратга солади.

Абдуғани Эрдонов қамалгач, унинг хотини ва қизи мажбуран Тожикистонга сургун қилинади. Набиралари эса онасидан маҳрум қилиниб, Ўзбекистонда қолади.

Орадан беш йил ўтиб, Зумрад вояга етмаган уч фарзанди билан қўшилишга муваффақ бўлганини айтмоқда.

«2014 йили ички ишлардаги Асом деган бола келди. Мажбурлади. Чиқасан деди, сўкди, ҳар хил гаплар гапирди. Ёш болаларим бор, қаерга чиқаман, дедим. Мана шундай ҳужжат тайёрлаб, мажбур қилди қўл қўйишга. Кичик ўғлим бир ёшга тўлган куни чиқиб кетдим», дейди Зумрад Эрдонова.

Эрдоновлар Ўзбекистондаги ҳарбий қисмларнинг манзилларини тўплаганликда айбланишган.

Жумладан, 2014 йилнинг апрелида интернетда Эрдоновлар иши ҳақидаги “Тожикистон: оч бўлсак-да, 30 кумуш тангага хоинлар ёллаймиз” сарлавҳали рус тилидаги мақола пайдо бўлади.

Мақолада Ўзбекистон ҳудудида террорчилик ҳаракатлари тайёрлаган тожик диверсантларининг кенг тармоғи фош этилгани иддао қилинган эди.

Тергов машинаси Тожикистон фойдасига ҳаракат қилган жосуслар ролини ўйнашга маҳкум оила аъзоларининг тақдирини вайрон қилишда давом этади.

«Оиламизнинг 12 нафари, жумладан, акаларим ва жиянларим Абдуғани, Равшан, Эркин, Бегали, Мўмин Тожикистон фойдасига жосусликда айбланиб, узоқ йилга қамоқ жазосига хукм қилинди. 2013 йили 11 йилга қамалган қариндошимиз Хадича Хўжамуродова айни пайтда аёллар колониясида жазо муддатини ўтамоқда. У ҳибсга олингандан сўнг уч фарзанди Тожикистонга депорт қилинган эди. Дилфуза Қурбонова ва Гулчеҳра Қурбонова эса аёллар қамоқхонасида бир йил ўтиб оламдан ўтишган», дейди Раҳмонали Эрдонов.

Жорий йилнинг июлида Эрдонов Жаслиқ қамоқхонасидан Шерабоддаги манзил колониясига кўчирилди.

Беш йил Жаслиқда бўлган Эрдонов соғлиғини йўқотди. Жиноят ишидаги ёвузларча қилинган қонунсизликларга қарамай, ёпиқ ҳарбий суд ҳукми билан у яна 10 йил манзил колониясида қоладиган бўлди.

Бир вақтлар Сурхондарёнинг қудратли шахсларидан бўлган МХХ полковниги Нодир Тўрақуловнинг ўзи ҳозир ҳибсда сақланмоқда. Бироқ у уйдирган жиноят иши ҳамон ўз кучида қолмоқда ва у панжара ортига ташлаган одамлар эса қамоқда муддат ўташмоқда.

Eltuz.com

Тағин ўқинг
25 январ 2021
Ўзбекистон маданият вазири Озодбек Назарбеков боғча болаларига ҳар куни мақом ва миллий куйлар эшиттириш таклифи билан чиқди. Эндиликда мактабгача ...
7 декабр 2015
Омадли бизнесмен ва Ўзбекистондаги илк хусусий банкни ташкил қилган Рустам Усмонов, ўша пайтларда ҳали Тошкентдаги энг олий кабинетларга кира ...
21 май 2018
Андижон шаҳрининг сўконғич ҳокими Дилмурод Раҳматуллаевнинг тилини тушовлашнинг умуман имкони бўлмаяпти. Ўтган йили шундай феъли сабабли у суд қарори ...
19 май 2020
Лейтенант чиқиб, «Бу ерда тўпланишиб туришма, тез кетиш», деб милисахона эшигини ëпди. Ҳаëтилланинг олди айнагига стикер ëпиштирилган  «Дамаси»га Абсаттор ...
Блоглар
17 март 2024
Рассом Туз бир мавзу муҳокамасини бошласа ағдар тўнтарини чиқариб барча қирраларини ўрганади. Танганинг ағиниям¸ бағиниям¸ ...
14 феврал 2024
«Ёшлар» телеканалида содир бўлаётган коррупция олдида «Спорт» телеканали директори Зоҳид Каримов қўй оғзидан чўп ололмайдиган ...
13 феврал 2024
Тармоқнинг ўзбек сегменти ўзбек давлат рамзларига нафратни парваришламоқда. Ижтимоий тармоқларда маҳалла раиси ва фаолларнинг давлат ...