«Вор в законе» Бахти Ташкентскийнинг ўғли автоҳалокатда омон қолди

Ўзбекистондаги жиноят олами қироли Бахти Ташкентский номи билан машҳур Бахтиёр Қудратуллаевнинг 28 яшар ўғли Ихтиёр Тошкентнинг қоқ марказида қимматбаҳо машинасини авария қилди.

11 мартдан 12 мартга ўтар кечаси юз берган автоҳалокатда Ихтиёр ва машинада бўлган унинг икки дўстига ҳеч қандай шикаст етгани йўқ, аммо  яп-янги «Порш» электромобили яроқсиз ҳолга келган.

@eltuz га етиб турли телеграм каналлардан келган видеодан маълум бўлишича, дўстларининг эътирозларига қарамай, Ихтиёр Тошкент қоқ марказидаги Амир Темур хиёбонида машина тезлигини оширади ва хиёбон айлана йўли бурилишида электромобилни идора эта олмай қолади.

Натижада нархи 150 минг доллар турувчи электромобил тўғри бориб дарахтга урилган. Тўқнашув пайтида автоматик тарзда очилган «хавфсизлик ёстиқчаси» электромобил ичида бўлган ёшларнинг ҳаётини сақлаб қолган.

Гувоҳлар кучли зарба натижасида электромобил тутаб кетганини айтишди.

@eltuz га юборилган суратга қаралса, олд қисми қаттиқ шикаст еган элекромобилнинг яроқсиз ҳолга келиб қолганини англаш мумкин.

Ўғрилар дунёсининг айрим экспертлари иддаосига кўра, Ўзбекистонда ягона «вор в законе» 50 яшар Бахтиёр Бахти Ташкентский 26 ëшида “вор в законе” тожини кийган Ўзбекистондаги ягона криминал авторитет ҳисобланади.