Сайловни ўтказиш билан Сардор шуғулланади

Сайлов бу демократиянинг умуртқа поғонаси. Ҳар бир ватандош парда билан ўралган хонага кириб, ўз сиëсий иродасини билдириб иқтидор векторига таъсир кўрсатиш имконига эга. Бу имкондан фойдаланиш масаласи айри.

2024 йили дунëнинг 60 дан зиëд давлатида сайлов бўлади. The Economist журналига кўра, айнан бу йил тарихни ўзгартира оладиган сайловлар ўтади. Ўзбекистон ҳам демократик ва дунëвий тамаддуннинг парчаси ўлароқ йил сўнгида депутатларни сайлайди. Халқ депутатлари вилоят, туман ва шаҳар Кенгашлари сайловига тайёргарлик кўриш масаласи Элтузда мавжуд эксклюзив маълумотга кўра, Президентнинг махсус топшириқлар бўйича маслаҳатчиси  Сардор Умрзоқовга топширилган.

Элтуз мухбири олган видеода Сардор Умрзоқовнинг сайловга тайëргарлик кўриш учун Наманган вилоятига боргани акс этган.

2022 йилнинг июль ойидан Президент администрацияси раҳбари лавозимида ишлаб келган Сардор Умрзоқов 2023 йилнинг август ойида Президентнинг махсус топшириқлар бўйича маслаҳатчиси лавозимига тайинланган эди.

Амалда аввалдан ушбу лавозим бўлмаганлиги сабабли, ҳозиргача Сардор Умрзоқов ушбу лавозимда қандай вазифани бажараётгани ёки бажариши жамоатчилик олдида очиқ савол бўлиб турган эди. Мана Элтуз бу саволга ҳам жавоб топди.

Мамлакат депутатларини янгилаш, нафталин сиëсат ва эски балластлардан қутулишни кўзлаган сайловни сифатли ўтказиш каби вазифа Сардор Умрзоқовга топширилгани аëн бўлди.

Элтуз уйдаги гапни кўчага чиқаради.