Асосий мавзулар
10 апрел 2017

UzLiDep тадбирлари «аввалгиларга ўхшамас»ми?

«XXI аср» газетаси (06.04) ўз муассиси бўлмиш партия – ЎзЛиДеПнинг «аввалгилардан фарқли тадбирлари энди кўпчиликда катта қизиқиш уйғотаётгани»ни билдирди.

Бу «катта қизиқиш»га сабаб сифатида «тадбирлар шакл ва мазмун жиҳатдан тобора такомиллашиб, том маънодаги очиқ мулоқотлар, давра суҳбатлари тусини олаётгани» экани айтиб ўтилади.

Биз сўнгги вақтларда кўпайгандан кўпайиб бораётган, аслида халқнинг оғирини енгил қилиш учун эмас, балки ҳисобот учун ўтказилаётгандек таассурот уйғотаётган бу тадбирларни ёритиш асносида эълон қилинаётган айрим рақамларга эътибор қаратишни маъқул кўрдик.

Партиянинг Тошкент шаҳар кенгаши ўтказган давра суҳбати ҳақида ёзган газета ўтган йили пойтахтда ташкил этилган 7492 та кичик бизнес ва тадбиркорлик субъектидан 4285 таси тугатилганини маълум қилади.

Эътибор қилинг-а, кичик бизнес ва тадбиркорликни ривожлантириш иқтисодиёт тараққиёти ва жамият янгиланишининг асосий йўналиши сифатида кўрилаётган мамлакатнинг биргина ҳудудида аҳвол шунчалик даражада ёмон.

Ҳукуматнинг баландпарвоз ваъдалари қанотида бир йил давомида ташкил этилган бизнес субъектларининг қарийб 60 фоизи ишлай олмай, дарҳол синиб кетгани аслида мамлакатдаги бизнес муҳити абгор эканидан дарак бермайдими?

Аммо газета бу рақамни келтирганидан сўнг аҳволни «силлиқлаб» ўтишнинг йўлини топганига қойил қолиш керак.

«Бу рақамлар, гарчи юртимизда хусусий бизнес учун ғоят қулай шарт-шароит яратилган бўлса-да, тадбиркорларнинг билим ва кўникмалари етарли эмаслигидан… далолат беради», дейди муаллиф.

Тадбиркорлар партияси ўз электоратини айбдор қилганидан сал юзи қизарган шекилли, масаланинг асл сабаблари қаторига «ишбилармонлар дуч келаётган муаммоларни бартараф этишга оид ёндашувлар, услублар яхши самара бермаётгани»ни ҳам санаб ўтишга мажбур бўлган.

Шунингдек, партия турли тадбирлар ўтказиш орқали «туман ҳокимликлари билан биргаликда 52 та хусусий фирма фаолияти қайта тиклангани»ни ғурур билан тилга олади.

4 мингдан зиёд синган тадбиркорнинг 52 тасига ишини тиклашга ёрдам берганидан ифтихор этаётган партияга шон-шарафлар йўллайликми ёки шу партия асосида шаклланган ҳукуматнинг бизнесга йўл бермаётганини танқид қилайликми?

Баҳодир Шариф
Ўзбекистонлик газетхон таҳаллуси
Eltuz.com

Тағин ўқинг
17 март 2017
16 март куни эрталаб, иммиграция қоидаларини бузганлик айби билан ушланган Россиянинг «Новая газета» мухбири 30 яшар ўзбекистонлик Худоберди Нурматов ...
2 ноябр 2015
Улуғбек Ашур Eltuz.com АҚШ давлат котиби Жон Керри ва Ислом Каримовга «ноқулай» савол берган журналистларнинг матбуот анжумани ўтаётган залдан ...
26 апрел 2018
Оҳак зарраларидан кўзлари шикастланган, давлат тўнтаришида айбланиб қамалган 28 ёшли тошкентлик блогер ва ёш олим Акром Малик ҳамон қамоқхона ...
4 октябр 2016
Каримовнинг 27 йиллик иқтидори даврида, иқтисод, маданият, маориф жар ёқасига келди. Шавкат Мирзиёев эса, кўп ўйлаб ўтирмасдан, устозидан ўрганган ...
Блоглар
14 декабр 2018
Фарғона мусиқали драма театри актрисаси Малоҳат Тоирова томошаларига қалбаки чипталар сотилганлигини фош қилгани учун ишдан ...
13 декабр 2018
Шу кунларда кўплаб нашрлар Гулнора Каримованинг Ўзбекистон ҳукуматини моддий қўллаб-қувватлаш ниятида экани ҳақида ёзишди.   Жамиятдан ...
4 декабр 2018
Ўзбекистонда Мудофаа вазирлиги қўшинларининг жанговар тайёргарлигини синовдан ўтказиш мақсадида ташкил этилган кенг кўламли ўқув машғулотлари ...