Муваққат президент ҳам маслаҳатгўйликни бошлади

«XXI аср» газетасида пахта етиштирувчи хонқалик фермернинг номидан ҳам бир мақола эълон қилинган. Унда фермер муваққат президент ва амалдаги бош вазир яқинда Хоразмга ташрифи чоғида «янада кучлироқ иқтисодий муҳит яратиш, халқнинг ҳаёт даражасини юқори поғонага кўтариш юзасидан қимматли маслаҳатлар бергани»ни таъкидлайди.

Марҳум президент ҳам «ҳаёт даражасини юксалтириш» борасида маслаҳат беришни яхши кўрарди. Лекин халқнинг ҳаёти у бу дунёни тарк этиб кетаётганда ҳам юксалмай қолаверди. Кўпчилик бўлажак давлат раҳбари сифатида кўраётган муваққат президентнинг маслаҳатлари халқ аҳволига қандай таъсир қиларкин!?

Фермер сўзларида давом этиб, сентябрь ойининг ўзидаёқ пахтадан 40 центнердан ҳосил олганини айтиб мақтанади. Яна ҳали даласида ҳосил мўллигини қўшимча қилади.
Деҳқонлар яхши билади, 40 центнердан ҳосил олинган далада, айниқса, бу ёғи октябрнинг ярми ўтиб қолган пайтда яна мўл пахта қолишига ишониш қийин.

Майли, газета бир лоф қилгандирда, деб ўйларсиз. Бўлмаса мақолага пахта териш машинасининг сурати илова қилинганига нима дейсиз? Бу газетхонларнинг устидан кулишми ёки хаёлнинг рўёбини кўриш иштиёқими?

Баҳодир Шариф
Ўзбекистонлик газетхон таҳаллуси
Eltuz.com