Асосий мавзулар
22 март 2019

Шантажни асосий қуролига айлантирган подполковник

Ушбу мақола “Элтуз” мухбирининг бир-бирини танимайдиган қатор тошкентлик тадбиркорлар билан суҳбатлари асосида тайёрланди.

Мақолада гап тадбиркорларга очиқча таҳдидлар қилиб, уларни ўмариш йўлига ўтган ички ишлар подполковниги ҳақида боради.

Бир-биридан алоҳида тўртта шахснинг иддаосига кўра, Тошкент шаҳри ички ишлар бошқармаси уюшган жиноятчиликка қарши курашиш бўлими бошлиғи Умид Қурбонов “профилактик суҳбат” баҳонасида тадбиркорларни очиқчасига ўмаришга ўтган.

Босим остида қолишларидан қўрқиб аноним тарзда суҳбатлашган тадбиркорлар “Элтуз” мухбирига ички ишлар подполковниги Умид Қурбонов, асосан, ўтмишда судланган тадбиркорларни нишонга олаётганини иддао қилишди.

Уларнинг сўзларига кўра, Умид Қурбонов январь ойидан буён гўёки жиноятчиликнинг олдини олиш мақсадида Каримов даврида судланган тадбиркорларни “профилактик суҳбат”га чақириб, улардан очиқчасига бир неча минг доллардан бир неча ўн минг долларгача пул таъма қилмоқда.

Тадбиркорлар бундай “профилактик суҳбатлар”да подполковник доимо бир шахс – президент Мирзиёевнинг катта куёви Ойбек Турсуновнинг акаси, Тошкент ИИБ бошлиғининг ўринбосари Улуғбек Турсунов буйруғи билан иш олиб бораётганини пеш қилади.

ИИБ оталиққа олган Тошкентнинг Шайхонтоҳур туманидаги “Комил авлод” номли 412-мактабгача таълим муассасаси

Тадбиркорлар билан бўлган суҳбатлардан маълум бўлишича, подполковник тадбиркорлар билан суҳбатда одатда икки босим усулини қўллайди:

1- усул: “Сенинг жиноий тўдаларга алоқанг бор экан. Қамалиб кетишни истамасанг, даромадингдан 20 фоизини келтириб берасан. Ўшандагина сенга ҳеч ким тегмайди. Сен Улуғбек Турсунов ҳимояси остида бўласан”;

2-усул. “Сенинг жиноий тўдаларга алоқанг бор экан. Қамалиб кетишни истамасанг, ИИБ оталиққа олган болалар боғчасини таъмирлашга пул ёки қурилиш молларини келтириб берасан. Ўшандагина сенга ҳеч ким тегмайди. Сен Улуғбек Турсунов ҳимояси остида бўласан”.

Тадбиркорларга кўра, мазкур усулларни Умид Қурбонов тунги клуб ва ресторанлар эгалари, дўкондорлар ва ўрта ишлаб чиқарувчиларга нисбатан қўлламоқда.

“Каримов даврида маҳкум робаси (кийими)ни кийган тадбиркор қайтиб у ерларга боргиси келмайди. Умид Қурбонов босимларидан қутулиш учун бундай шартларга рози бўляпмиз”, деди исми сир қолишини сўраган тошкентлик тадбиркор.

Бошқа бир тадбиркор эса Улуғбек Турсуновнинг бу таъмагирликдан умуман бехабар бўлиши мумкинлигини айтди.

“Улуғбек Турсунов бундай ишларга умуман аралашмайди. Менимча, Умид Қурбонов бошлиғининг исмини сотяпти, холос”, деди у.

21 март куни “Элтуз” мухбири билан суҳбатлашган бошқа бир тадбиркор эса Умид Қурбонов таъмагирликда янги усулни қўллашга ўтганини айтди:

“Ҳозир тадбиркорларни бирма-бир чақириб, 2 мингдан 20 минг долларгача сўряпти. Нима эмиш – янги каттароқ лавозимга ўтаётган эмиш”.

“Элтуз”нинг изоҳ олиш учун Умид Қурбонов билан боғланиш уринишлари натижа бермади.

Аюб Мингбоев
Eltuz.com

Тағин ўқинг
27 август 2018
Швециянинг Telia трансмиллий коммуникация компанияси собиқ бошқарувчилари 4 сентябр куни Ўзбекистоннинг марҳум президенти Ислом Каримовнинг қизи Гулнорага пора беришгани ...
21 август 2019
“Бу мактубни сизга ëзаëтган пайтимда хоразмлик адабиëт ихлосмандлари вилоят ИИБ биноси олдида норозилик пикети ўтказиб турибди. Уларнинг талаби ўта ...
15 август 2018
Дунёда энг узоқ муддат турмада бўлган журналист Муҳаммад Бекжон Жаслиқ қамоқхонасини тарк этгач, уни Тошкентнинг Зангиота турмасига этап қилишади ...
4 июл 2016
Айни кунларда Низомий номидаги педуниверситетнинг 1940-йилларда машҳур архитектор Е.Жмуйда лойиҳаси асосида қурилган биноси таъмирлаш баҳонасида вайрон қилинмоқда. Бино маданий ...
Блоглар
2 июл 2020
6-синфда ўқирдим, Кампучияда давлат тўнтариши бўлиб ҳукуматга Пол Пот раҳбарлигидаги “Қизил кхмерлар” келганини, улар бутун ...
25 июн 2020
​​Халқаро пресс-клубда матбуот анжумани бўлиб ўтибди, унда Инсон ҳуқуқлари бўйича Миллий марказ директори Акмал Саидов ...
21 июн 2020
(бўлган воқеа) Таржимон сифатида Россиянинг милиция бўлимларидан бирига чақиришган эди. Бўлимда жиноятчи сифатида гумон қилинган ...