Асосий мавзулар
9 ноябр 2017

Бу кетишда тиббиётни ислоҳ қилиб бўладими?

Маълум бўлишича, ўтган якшанба куни Тошкентдаги бир қанча шифохонаю поликлиникалар ходимлари Сергелида янги қурилаётган уйлар олдини тозалаш, уларни тартибга келтириш, чанг-чўнгларини артиш ишларига сафарбар қилинган.

Президент тўртинчи бор медикларни танқид қилди. Рассом Туз

Бунга сабаб мазкур уйларнинг тез орада президент иштирокида фойдаланишга топширилишига тайёргарлик кўришдир.

Яқинда Ўзбекистон президенти, адашмасам, тўртинчи бор тиббиёт соҳасидаги ислоҳотлар бўйича катта йиғилиш ўтказди.

Бу сафар ҳам мазкур соҳадаги камчиликларни аямасдан танқид қилди, қанчадан қанча раҳбарларни койиди.

Ҳали ҳеч бир соҳа бўйича президент бунча кўп ва дам-бадам мажлис ўтказмаган бўлса керак. Шунинг ўзиёқ тиббиётнинг бугунги ҳолати қанчалик ночор эканидан дарак беради.

Лекин ўчоққа ўтин тиққан билан уни ёқмасдан овқат пишириб бўладими? Тиббиётимизни “тирилтириш”га уринишга қаратилган саъй-ҳаракатлар айни шу ҳолатни эсга солади.

Энди мана шу фикрларимизни исботлашга ҳаракат қилиб кўрамиз.

Фейсбук саҳифасидан скриншот

Тиббиёт ходимлари ўз ишлари қолиб, йил давомида бошқа ишларга жалб қилинади. Кўчаларни тозалаш керакми, ўшалар (ўқитувчилар билан бирга).

Фейсбук юзери Ангелина Назарова Сергелидаги қурилишларни тозалашга тиббиёт ходимларидан ташқари ўқитувчиларнинг ҳам крепостной каби текин ишчи кучи сифатида жалб қилинаётгани ҳақида ёзди. Ўқитувчилар қўпол муносабат сабаб ишдан бош тортишгач, мактаб директорига ҳайфсан берилган, ўқитувчиларга эса 5000 сўмдан йиғиб бериш буюрилган.

Пахта териш керакми, биринчи навбатда яна тиббиёт ходимлари ва ўқитувчилар далага ҳайдалади. Бирор катта ишга ҳашарчи керакми, марҳамат, дўхтирлар бор, ўқитувчилар бор.

Пахта теримидаги “кўнгиллилар” ҳам асосан шифокор ва ўқитувчилар. Рассом Туз

Куни-кеча “Kun.uz”да ўқиб қолдим. Эндигина ўқишни битирган ёш, интилувчан тиббий мутахассис тумандаги поликлиникага ишга кирибди.

Кўп ўтмай ўзининг шундай қобилияти учун бош шифокор даражасига етишибди.

Лекин орадан сал ўтмай, дўхтирларини пахта теримига сафарбар этиш ҳақидаги буйруқни бажара олмагани учун ишдан бўшатилибди.

Мана шунақа гаплар бугун юртимизда. Тиббиёт муассасаларидаги мажбурий меҳнат, порахўрликлар, таъмагирликлар ва бошқа иллатлар ҳақида кўплаб мисоллар келтириш мумкин.

Барака топгурлар (Ислом Каримов кўп ишлатарди бу сўзларни), тиббиёт ходимларини ўз ҳолига қўймасдан, бевосита вазифаси бўлмаган ҳар ишга жалб қилаверсак, соҳани ислоҳ қилиб бўладими, дейдиган мард йўқ.

Ҳар қанча мажлислар ўтказмайлик, соҳадаги раҳбарларни ҳар қанча алмаштирмайлик, аввало, мана шундай ҳолатларга барҳам бермасак, тиббиётдаги ислоҳотлар кўзланган самарани бермаслиги аниқ.

Ҳа айтганча, бу гаплар бошқа соҳаларга ҳам тааллуқли…

Сардор Азим
eltuz.com

Тағин ўқинг
7 сентябр 2017
Футбол мураббийси Самвел Бабаян, жаҳон чемпионатига чиқиш вазифасини уддалай олмагани ортидан истеъфога кетди. Ўзбекистон Футбол Федерацияси Самвел Бабаян миллий ...
23 октябр 2015
Улуғбек Ашур, Eltuz.com Шу йилнинг 4 сентябр куни Жиззах вилоятининг Пахтакор туманида яшовчи 33 ёшли Арамаис Авакяннинг хонадонига нохуш ...
6 апрел 2018
Тошкент шаҳри бош имом-хатиби 60 ёшли Анвар Турсунов халқ орасида 16-горбольница деб айтиладиган Шошилинч тиббий ёрдам кўрсатиш республика илмий ...
7 феврал 2018
Мустақилликнинг илк йилларида Ўзбекистон президенти Ислом Каримов шўролар даврида республикани узоқ йиллар бошқарган Шароф Рашидовнинг номини гўёки оқлашга қаратилган ...
Блоглар
4 декабр 2019
(Муҳаммад Солиҳ ва Нуруллоҳ Муҳаммад Рауфхон суҳбатларини тинглаб) 1980 йиллар бошида раҳматли отам Мадамин Бек ...
27 ноябр 2019
Ўзбекистон Бош прокуратураси Тошкент шаҳри ҳокими Жаҳонгир Ортиқхўжаевнинг ижтимоий тармоқда тарқалгани аудиоёзувидаги ҳолатларни текшириш юзасидан ...
19 ноябр 2019
Матбуот хизматлари ва жамоатчилик билан алоқалар соҳаси бўйича таҳлиллар рукнимизнинг янги сонига катта эҳтиёж пайдо ...