Асосий мавзулар
26 феврал 2018

Мардикор энди Қозоғистондан хавфсирмай ўтадими?

Ўзбекистон ҳукумати ташқи меҳнат миграциясини тизимли бир шаклга солиш йўлидаги навбатдаги қадамини ташлади.

Хабарларга кўра, Россиянинг бир неча федерал округида Ўзбекистоннинг бош консулхоналарини очишга келишиб олинган. Бу консулхоналар Владивосток, Екатерингбург, Қозон ва Ростов шаҳарларида очилади.

Албатта, бу саъй-ҳаракатлар йиллар давомида ҳақ-ҳуқуқлари поймол этилиб келинган ўзбек мардикорлари учун ажойиб янгиликдир.

Иккинчи янгилик эса меҳнат мигрантларини Ўзбекистонга тегишли автобусларда Россияга ташишнинг йўлга қўйилишига оиддир.

Бундан аввалроқ президент Шавкат Мирзиёев мутасаддиларга Россияга авиақатновлар ва темир йўл қатновлари нархини тушириш топшириғини берганди.

Бу қарорларнинг барчаси Россияга бориш учун автобусда йўлга чиққан 52 нафар юртдошимизнинг Қозоғистон ҳудудида фожеали равишда ҳалок бўлгани ортидан қабул қилинди.

Таъкидлаш керакки, шу пайтгача ўзбек мигрантларини Россияга автобусда элтиб қўйиш билан аксарият ҳолларда қозоғистонлик ҳайдовчилар шуғулланиб келган. Чунки Қозоғистон ҳудудида мигрант ташиш анча хатарли иш.

Бу мамлакат ҳудудидан хоҳ поездда, хоҳ автобусда ўтаётган ўзбекистонлик мигрантларга нисбатан рэкет, босқинчилик, товламачилик жиноятлари содир этиб келинади. Қўшни мамлакатда улар деярли ҳеч қандай ҳимояга эга эмас.

Шунинг учун ўзбекистонлик автобус ҳайдовчилари бу йўналишда йўловчи ташишдан қўрқади.

Қозоқлар бу бизнеснинг катта даромад келтиришини дарров ҳис қилиб, уни бутунлай қўлга олган. Қуш тилини қуш билар деганларидек, қозоқ ҳайдовчилари билан қозоқ рэкетчиларининг тил топишиши осонроқ кечади.

Меҳнат мигрантлари учун эса Россияга бориш учун энг арзон мазкур транспортдан фойдаланишдан бошқа имконият йўқ. Улар жонларини хатарга қўйиб бўлса-да, шу йўлни танлашга мажбур бўлиб келган.

Энди Ўзбекистондан Россияга тўғридан-тўғри автобус қатновлари йўлга қўйилаётган экан, айнан Қозоғистондаги хавфсизлик масалаларига эътибор қаратиш керак бўлади.

Маълум бўлишича, Ўзбекистон ҳукумати меҳнат муҳожирлари қатнови билан боғлиқ белгилаган чора-тадбирлар қаторида шу масала ҳам бор.

Энди гап бундай қатновлар хавфсизлиги қай даражада таъминланишида. Бунинг учун эса Қозоғистон ҳукуматининг қўллаб-қувватлашига эришиш керак бўлади.

Зеро, қозоқ рэкетчилари йиллар давомида ўрганган осон даромад кўриш манбаларидан индамайгина воз кечишига ишониш қийин.

Баҳодир Шариф
Eltuz.com

Тағин ўқинг
15 март 2018
Президент Мирзиёев танқиди ортидан 15 март куни «Тўй-ҳашамлар, оилавий тантаналар, маърака ва маросимлар, марҳумларнинг хотирасига бағишланган тадбирлар ўтказилишини тартибга ...
17 феврал 2021
Бу Самарқанд вилояти Пастдарғом туманида яшовчи ночор оиланинг уйи. Бу уйда Норбек хотини ва икки боласи билан яшайди. У ...
5 апрел 2023
Буюк Британия бокс бўйича эркаклар ўртасидаги жаҳон чемпионатида Россия иштирок этишидан хавотирланиб, уни бойкот қилишга қарор қилди.  Халқаро бокс ...
8 январ 2017
Шавкат Мирзиёев икки куёвини ҳаётларидаги энг йирик янги йил совғаси билан сийлади. Катта куёв Ойбек Турсунов президент маъмурияти раҳбари ...
Блоглар
17 март 2024
Рассом Туз бир мавзу муҳокамасини бошласа ағдар тўнтарини чиқариб барча қирраларини ўрганади. Танганинг ағиниям¸ бағиниям¸ ...
14 феврал 2024
«Ёшлар» телеканалида содир бўлаётган коррупция олдида «Спорт» телеканали директори Зоҳид Каримов қўй оғзидан чўп ололмайдиган ...
13 феврал 2024
Тармоқнинг ўзбек сегменти ўзбек давлат рамзларига нафратни парваришламоқда. Ижтимоий тармоқларда маҳалла раиси ва фаолларнинг давлат ...