Муҳаббат Назар: Арабқуллик бу иллат!!!

«Арабистон тупроғида бола туғиш» мақсадидаги хотинлар ва уларни етаклаб кетаётган эркаклар. Арабистонда ўқилган шаърий никоҳга реклама тус бера бошлаган ёш келин – куёвлар Ўзбек жамиятининг бўлғусидаги катта хатаридир!

Бу тутум ўз зурриёдини давлатга ишонмаслик ва ватан қадрини тахқирлашдан бошқа нарса эмас. Ўзбекистон мусулмонлари идорасининг «Шаръий никоҳдан ўтиш одоблари» ҳақидаги фатвосида: никоҳ маросими диёримизда қадимдан миллий ва диний удумлар асосида амалга ошириб келингани баён қилинган.

Шаръий никоҳдан ўтиш учун келин – куёвлардан талаб қилинадиган шарт ва одоблар мавжуд.

Ўзбекчиликка хос ва мос бўлган мавжуд қонун – қоидаларни иккинчи даражага қўйишга уринаётган арабчи тоифаларга қонуний жазо берилса, мақсадга мувофиқ бўлади. Лозим бўлса, давлат буларни фуқаролик хуқуқидан чиқариб юборсин – ки, ўзлари улуғлаган араб чўлларида қўним топсин, яшасин. Боласининг келажагини ўша ерларда қурсин.

Шахсан мен, ўз юртимда араб миллати маданияти билан уйғунлашган маданият истамайман. Мозийдан бошланиб, бизни бугунларга келтириб қўйган ҳозирги «араб шайдолиги» вазиятидан ҳам норозиман!

Араб миллатининг маданияти, санъати, қадрияти ва яшаш шароити шахсан мен учун бутунлай ёт. Қолаверса, мусулмон бўлиш важи билан арабни қадрлашга ёки унинг маданиятини нусхалашга мажбур эмасмиз! Ўзбек ўз юртида ўзлиги, қадрияти билан яшасин!

Уч минг йиллик тарихга эга Ўзбек давлатчилигининг буюк маданий меросини тинч қўйинглар. Йўқолсин ёт унсурлар! Йўқолсин ёт ғоялар тарғиботчилари!