Халқ душмани образи яратилган фильм тарғиб этилмоқда

2005 йилнинг май ойидаги Андижон шаҳрида юз берган воқеалар хақида хикоя қилувчи “Сотқин” фильми шу кунларда Жиззах вилоятида кенг намойиш қилинмоқда.

“Сотқин” ва яна шу каби тарғибот рухидаги фильмлар шу йилнинг 4 апрелидан Жиззахда старт олган «Ким эдигу ким бўлдик, эртага қандай юксак марраларни эгаллашимиз керак?” деб номланган республика миқёсидаги тадбирлар доирасида намойиш қилинмоқда.

Таниқли шоир ва ёзувчилар, кино ва театр актёрлари хамда санъаткорлардан иборат бўлган меҳмонлар гуруҳи 9 апрелга қадар Жиззахнинг барча туманларидаги ўқув юртларига ташриф буюради ва махаллий оммавий ахборот воситалари тили билан айтганда “ўқувчи ва талаба ёшларни умуминсоний ва миллий қадриятлар, юксак инсоний фазилатлар руҳида тарбиялаш, уларнинг онги ва қалбини мафкуравий, маънавий ва ахборот таҳдидларидан ишончли ҳимоя қилиш, уларда ғоявий иммунитет ва фаол фуқаролик позициясини шакллантириш мақсадида” улар билан жонли мулоқотлар ўтказади.

Эски анъаналар руҳида

Коммунистик даврнинг энг яхши анъаналари рухдаги бу тадбир Ўзбекистон Республикаси Вазирлар Маҳкамасининг 2016 йил 22 январдаги «Маданий-маърифий ва тарғибот ишларини ташкил этишни янада такомиллаштириш чора-тадбирлари режаси”нинг ижроси доирасида ўтаказилаётгани махаллий матбуотда айтилаяпти.

Тадбирда иштирок этаётган Жиззахлик ўқитувчининг айтишича бу фильм 4 апрелдан буён, биргина Жиззах шаҳридаги таълим муассасаларининг 11 минг нафарга яқин ўқувчи ва талаба-ёшларига кўрсатилган.

“Бу Жиззах шахридан олинган рақам. Хали туманларимиздаги барча мактаб ва коллежларда хам “Сотқин” фильми намоиши 9 апрелгача давом этади. Андижонда бўлиб ўтган қонли воқеалар қандай содир бўлганини кўрсатувчи бу филмни ёшлар севиб кўришяпти. Одам сиғмай кетаяпти залларга” дейди Жиззахлик ўқитувчи.

Тадбир доирасида бу фильмдан ташқари режиссер Ҳилол Насимовнинг “Гумроҳлар” фильми хам кенг намойиш қилинаётгани айтилмоқда.

“Хорижга чиқиб олган турли ақидапарастлар, Ватанимиз хоинлари, киндик қони тўкилган бу юртга ғараз ният билан боққан ватангадоларни гумроҳлар сифатида кўрсатувчи бу фильм хам ёшларимиз томонидан жуда катта қизиқиш билан кутиб олинаяпти” деб хабар беради бу хақда Жиззах вилоят телерадиокомпанияси ўз дастурида.

Жиззахнинг расмий нашрлари «Ким эдигу ким бўлдик, эртага қандай юксак марраларни эгаллашимиз керак?” тадбирида “жами 19332 нафар, шундан 11 256 нафар ўқувчи ёшлар, коллеж ва лицейларда 6957 нафар, олийгоҳларда 1119 нафар, талабалар иштироки таъминлангани” хақида хабар берди.

Улуғбек Ашур
Eltuz.com