Ўзбек мобил оператори: «Нотанишни ром қил!»

«Оила ва жамият» газетаси (10.05) мобил алоқа компаниялари «хизматларининг миллий маънавиятимизга таҳдиди» ҳақида бонг урди.

Унда мобил алоқа операторлари томонидан СМС тарзида тарқатиладиган «Нотанишни ром қил», «Ёлғизликдан қутул», «Баҳорда севгингни топ» каби тийиқсиз хизматлар ортидан маънавиятимизга жиддий зарар келтирадиган офатларни гап билан адо этиб бўлмаслиги» айтилади.

Мақолада СМС орқали тарғиб қилинаётган бундай хизматлар ортидан оилалар бузилиб кетаётгани, хиёнат ва алдовлар кўпайиб бораётгани таъкидланади. Ҳаётда учраётган худди шу каби ҳолатлардан мисоллар келтирилади.

Муаллиф мобил алоқа компанияларининг «бундай бешарм хизматлари миллий қадриятларимиз, менталитетимизга хос одоб-ахлоқ тамойилларига мутлақо мос келмаслиги»ни қайд этади.

«Биргина «Нотанишни ром қил» деган жумланинг ўзида на ҳаё, на андиша ва на орият бор. Дағалроқ изоҳ учун узр сўраймизу, лекин «Нотанишни ром қил» хизмати гўёки фоҳишаликка чорловдек янграяпти», деб ёзади муаллиф.

Газетада назоратчи ташкилотлар нега мобил алоқа компанияларининг «ўзбекона одоб-ахлоқ мезонларига мос келмайдиган хизмат турларини тарқатишига томошабин бўлиб тураётгани»га изоҳ талаб қилинган.

Баҳодир Шариф
Ўзбекистонлик газетхон таҳаллуси
Eltuz.com