Талаба ўлимида айбдорларга жазо сўралган петицияга 15 минг имзо тўпланди

Шафқатсиз калтак жароҳатларидан вафот этган Тошкент тиббиёт коллежи талабаси ўлими айбдорларига жазо сўралган петицияга 15 мингдан зиёд имзо тўпланди.

Хабарларга кўра, 17 ёшли Жасурбек Ибрагимов 3 май куни ўз курсдошлари томонидан шафқатсиз калтакланган.

Оғир аҳволда шифохонага ётқизилган талаба 5 та жарроҳлик амалиётини кечирган ва 1 июнь куни жони узилган эди.

Воқеа юзасидан ижтимоий тармоқларда норозилик акциялари шиддат билан давом этди.

Нохуш фожеа тафсилотлари минглаб юзерлар томонидан Телеграм, Фейсбук, Однокласники, Вконтакте ижтимоий тармоқлари бўйлаб тарқатилди.

Жумладан Мария Леглер номидан change.org тармоғида 3 июнда эълон қилинган, ўн беш минг имзо кўзланган петицияни қўлловчилар сони ҳамон ўсишда давом этмоқда.

Элтуз ушбу мақолани нашр қилаётган вақтда ушбу акция иштирокчилари сони 15 405 нафарга етди.

Бу ўзбек сегментида қисқа муддат ичида энг кўп имзо тўпланган электрон петициядир.

Eltuz.com