Асосий мавзулар
30 апрел 2019

Сергей Майоров: Олий суднинг журналистлар уйини тортиб олиш бўйича ажрими абсурд ва адолатсиздир!

Ўзбекистон Олий суди жорий йилнинг 16 апрель куни журналист Бобожоновларга тегишли уйларни тортиб олиш тўғрисидаги суд қарорларини ўз кучида қолдирди.

Журналист Ғайрат Бобожоновнинг суд қарорларидан норози бўлиб ёзган аризасига келган рад жавобга Ўзбекистон Республикаси Олий суди раисининг ўринбосари – фуқаролик ишлар бўйича судлов ҳайъати раиси Холмўмин Ёдгоров имзоси қўйилган.

Жаноб Ёдгоров аризани «ўрганиб чиққани» келтирилган важлар Олий суднинг 2019 йил 1 февралдаги ажримида «батафсил муҳокама қилинганлиги ва суд қарорларини бекор қилиш учун асос бўла олмаслиги сабабли» қаноатлантирилмаслигини билдирди.

2019 йилнинг 1 февралида Ўзбекистон Олий суди судьяси Жамшид Тиркашев хоразмлик журналистлар Бобожоновлар шикоятини рад этиб, уларнинг уйларини мусодара қилиш ҳақидаги суд ҳужжатини қайта кўриш учун асослар мавжуд эмас, дея ажрим чиқарган эди.

«Суд механизмларининг бирортаси ҳам ишламади»

Адвокат Сергей Майоров

Жамшид Тиркашев суд ажримида журналистларга қарашли уйларнинг давлат рўйхатига олинмагани боис мулкларнинг давлат фойдасига мусодара қилиш қарорини қонуний, дея иддао қилган.

Бироқ журналистларни ҳимоя қилаётган Тошкентдаги «Симай» адвокатлик бюроси вакили 13 февраль куни «Элтуз»га Олий суд ажрими ноқонуний эканини, мулкнинг давлат рўйхатига олинмагани уни тортиб олиш учун асос бўла олмаслигини билдирган ва Олий суд раисига ажрим юзасидан шикоят аризаси билан мурожаат қилган эди.

«Эслатиб ўтаман, 2018 йилнинг 22 январида мутлақо ноқонуний қарор қабул қилинган, қурилган турар жойларни давлат тасарруфига ўтказиш ҳақида. Бу хўжасизлик. Бутунлай абсурд қарор.

Чунки у ерда одамлар яшаяпти. Фойдаланилмоқда. Бундан ташқари, бу уйлар маҳаллий ҳукумат идоралари рухсати ва розилиги билан қуриб битказилган. Шунга қарамасдан, бу нарсалар инобатга олинмаган ва ноқонуний қарор чиқарилган.

Табиийки, шикоят қилинганидан кейин, албатта, қарор юзасидан турлича шикоят қилиш мумкин эди, ҳам янги юзага келган вазият бўйича, ҳам процессуал тартибда бу механизмларнинг бирортаси ишламади.

Иккала ҳолатда ҳам Бобожоновларнинг турар жойга эгалик ҳуқуқи рад этилди. Бу қарорларинг қандай ёзилгани, кўриниб турган фактларнинг инобатга олинмагани, гап алоҳида давлат амалдорларининг журналистларга нисбатан салбий муносабатидан келиб чиқиб нообъектив қарор чиқарилганини англатади.

Ушбу қарор буюртма тарзида чиқарилган. Ҳар ҳолда қайсидир давлат амалдорининг журналистлардан айнан шундай қасд олганига жуда кўп аломатлар бор. Бу, албатта, нотўғри ва адолатсиз қарор», дея таъкидлайди «Симай» адвокатлик бюроси раҳбари Сергей Майоров «Элтуз» мухбирига.

Судья ўз қарорини ўзи ўз кучида қолдирди…

Урганч тумани суди журналистлар Шуҳрат, Қудрат ва Ғайрат Бобожоновларнинг Урганч туманидаги уйларини мусодара қилиш қарорини ўз кучида қолдириши ортидан 2018 йилнинг 5 декабрь куни журналистлар ҳимоячиси суд ҳужжатларини назорат тартибида қайта кўриб чиқиш юзасидан Ўзбекистон Олий судига мурожаат қилган эди.

2018 йилнинг 27 декабрида Урганч туманлараро фуқаролик суди судьяси Ўткир Машарипов журналист ака-ука Бобожоновларнинг уйини мусодара қилиш борасидаги ўзи чиқарган қарорни кучида қолдирган эди.

Судья Ўткир Машарипов ўз қарорига асос қилиб судга мурожаат этишнинг барча муддатлари ўтказиб юборилганини рўкач қилган.

«Симай» адвокатлик идораси вакили шу боис биринчи инстанция ва кассация тартибидаги судларни четлаб ўтиб, Олий судга назорат тартибида мурожаат қилган эди.

Журналистларнинг Интернетдаги аккаунтлари очиқ таҳдид нишонига айланди

Журналист Қудрат Бобожоннинг сўзларига кўра, Олий суднинг бундай ажримига унинг «Элтуз» нашрида босилган МХХ ва ДХХ раҳбарлари кирдикорларига оид туркум мақолалари ва суриштирув фильмлари сабаб бўлган, айни мақолалар сабаб унинг тармоқдаги аккаунтлари очиқ таҳдид нишонига айланди.

«Уларнинг сўнггиси «ДХХ инқирози. Янги раҳбарият эски назоратини давом эттирмоқда» сарлавҳаси остида 2019 йилнинг 14 январида босилган, орадан 15 кун ўтиб – 1 февраль куни Олий суднинг ажрими чиқарилди», дейди «Элтуз» муҳаррири Қудрат Бобожон.

Унинг қўшимча қилишича, мақоладаги фактлар 8 февралга келиб тўлиқ тасдиқланди. ДХХ раиси Ихтиёр Абдуллаев ишдан олиниб, унга жиноят иши очилди. Ўнлаб ДХХ зобитлари қамалди. 11 февраль кунига келиб, Ихтиëр Абдуллаевнинг ўзи ҳам, «Элтуз» манбасига кўра, давлат тўнтариши қилишга уринишда гумонланиб қамоққа олинди.

2018 йилнинг 22 ноябрь куни «Озод Европа – Озодлик радиоси» (RFERL) нинг Вашингтондаги қароргоҳи маъмурияти бу амалнинг журналистлардан ўч олиниши экани ҳақида баëнот берганди.

Eltuz.com

Тағин ўқинг
21 март 2022
Ўзбекистоннинг «ДХР» ва «ЛХР» мустақиллигини тан олмагани Тошкентнинг позицияси кўп қутбли эканини кўрсатишга қаратилган, бироқ бу сиёсатни аксил-Россия сиёсати ...
18 январ 2016
Режалар зўр, аслидачи? Расмий нашрларда ёзилишича, Ўзбекистон президенти Вазирлар Маҳкамаси йиғилишида мамлакатнинг ялпи ички маҳсулотини 2030 йилгача 2 баробар ...
16 март 2016
“XXI аср” газетаси Ўзбекистон либерал-демократик партияси –ЎзЛиДеПнинг 2015 йилги бюджети ижроси ва 2016 йилги бюджетнинг асосий кўрсаткичлари тўғрисидаги ахборотни ...
29 март 2017
Мирзиёевнинг куёви Отабек Шаханов, Ўзбекистон президентининг Қозоғистонга расмий сафари чоғида ўзбек делегацияси таркибида кўринди. 22-март куни тасвирга олинган президент ...
Блоглар
17 март 2024
Рассом Туз бир мавзу муҳокамасини бошласа ағдар тўнтарини чиқариб барча қирраларини ўрганади. Танганинг ағиниям¸ бағиниям¸ ...
14 феврал 2024
«Ёшлар» телеканалида содир бўлаётган коррупция олдида «Спорт» телеканали директори Зоҳид Каримов қўй оғзидан чўп ололмайдиган ...
13 феврал 2024
Тармоқнинг ўзбек сегменти ўзбек давлат рамзларига нафратни парваришламоқда. Ижтимоий тармоқларда маҳалла раиси ва фаолларнинг давлат ...