Президентликка номзодлар нега суст бўлди?

“Миллий тикланиш” газетаси “Миллий тикланиш” демократик партиясидан президентликка номзод бу сайловда иштирок этишга рағбат кўрсатмаганини ёки унга фаол бўлишга “юқоридан” рухсат этилмаганини билвосита кўрсатувчи рақамларни эълон қилиб қўйди.

Газетанинг ёзишича, 2015 йилги президент сайловида қатнашадиган партия номзодига ташвиқот олиб бориш учун ажратилган маблағнинг бор-йўғи 289 миллион сўми сарфланган. Бу пулнинг жуда катта қисми, яъни 553 милион сўмдан ортиғидан фойдаланилмаган ва у Марказий сайлов комиссияси ҳисоб рақамига қайтариб берилган.

Умуман, партияларнинг эълон қилинаётган ҳисоботларида президент сайловида иштирок этиш учун давлат томонидан ажратилган катта маблағнинг асосий қисмидан фойдаланилмаганини кўриш мумкин. Бу эса эркин кузатувчиларнинг президентликка номзодлар фақат қўғирчоқ ролини ўйнаб бергани тўғрисидаги фикрларини тасдиқлайди.

Eltuz.com