Olimpiadadagi g‘alabalarning asl egasi aytildi
O‘zbekistondagi barcha nashrlarda sportchilarimizning Riodagi Olimpiadadan Vatanga qaytib kelishiga bag‘ishlangan maqolalar e'lon qilindi.
Albatta, O‘zbekiston sportchilarining Olimpiadadagi g‘alabalari xalqimizni quvontirmasdan qolmadi. Lekini shuki, ommaviy axborot vositalari g‘oliblardan-da oshirib-toshirib boshqalar sha'niga madhiya aytishga tushib ketdi. Ya'ni bu g‘alabalarning bosh sababchisi, demakki egasi boshqa odam bo‘lib chiqdi.
Xususan, «Milliy tiklanish» gazetasi (24.08.2016) Olimpiadadagi g‘alabadan keyingi ko‘z yoshlari bilan barchaning mehriga sazovor bo‘lgan bokschi Fazliddin G‘oibnazarov tilidan u avvaldanoq oltin medal olishni maqsad qilgani, «chunki «Go‘zal va betakrorimsan, muqaddas Vatanim, jonim senga fido, O‘zbekistonim!» shiori qalbidan mustahkam joy olgani»ni ma'lum qildi.
Buning ustiga, bokschimiz «ming-minglab yigit-qizlarning boshini silab, barchaga otalarcha g‘amxo‘rlik qilgan prezidentimizga minnatdorlik bildirdi».
Og‘ir atletika bo‘yicha oltin medal sohibi bo‘lgan Ruslan Nuriddinov esa «bugun jahon arenalarida erishayotgan har bir g‘alabamiz prezidentimiz rahnamoligida sportni rivojlantirishga qaratilayotgan doimiy e'tibor samaralari» ekanini bildirdi.
Olimpiya o‘yinlarida O‘zbekistonga birinchi bronza medalini olib bergan dzyudochi Diyorbek O‘rozboev ham bu yutuqlari bilan «xalqimiz va prezidentimiz ishonchini oqlaganidan xursandligi»ni yashirmadi.
Achinarlisi shundaki, sportchilarimizning tinimsiz mashg‘ulotlar, ota-onalar va murabbiylar yordamida erishgan bu g‘alabalari xalq manfaatidan yiroq bo‘lgan mafkura mag‘zavasiga qorishtirib tashlandi.
Nima bo‘lganda ham sportchilarimiz g‘alabasi qanchalik mafkuraga o‘ralmasin, aslida yutuqlar shu xalqniki, shu Vatannikidir.
Eltuz.com