Barcha partiyalar elektorati «manfaati»dagi farmon

O‘zbekistonning muvaqqat prezidenti Shavkat Mirziyoev imzolagan «Tadbirkorlik faoliyatining jadal rivojlanishini ta'minlashga, xususiy mulkni har tomonlama himoya qilishga va ishbilarmonlik muhitini sifat jihatidan yaxshilashga doir qo‘shimcha chora-tadbirlar to‘g‘risida»gi farmon OAVda navbatdagi ura-ura to‘lqinini boshlab berganini avval ham yozgandik.

Partiyalarga tegishli gazetalar undan o‘z maqsadlarida foydalanishga harakat qilyapti. Xususan, O‘zLiDeP nashri bo‘lgan «XXI asr» gazetasi (27.10) bu farmon partiya «elektorati himoyasini mustahkamlashi» haqida bong urdi.

Bundan avvalroq boshqa partiyalarning nashrlari ham bu farmonni ko‘klarga ko‘tarib maqtagan, u «bugungi kun talabidan kelib chiqib qabul qilingani», endi tadbirkorlik «yanada vo-o-o» bo‘lishini bashorat qilgan, bu esa ularning elektorati manfaatlariga xizmat qilishi aytilgandi.

Ilgarigi davlat rahbari tomonidan qabul qilingan shu kabi farmonlar tadbirkorlarning og‘irini sezilarli daraja yengillashtirmagani, bunisi ham aro yo‘lda qolib ketishi mumkinligi bugun partiyalarni qiziqtirayotgani yo‘q.

Asosiysi, bu hujjat qabul qilinganini qizig‘ida maqtab qolish kerak. Keyin nima bo‘lsa bo‘lar, u yog‘iga xudo poshsho…

Nima ham derdik, O‘zLiDeP vakili bo‘lgan muvaqqat va aftidan bo‘lajak prezident hamma partiyalarning elektoratini o‘ylaydigan rahbar ko‘rinadi. Shuning uchun barcha partiyalar ertaga yangi prezident ko‘rsatadigan «oqilona tanlangan, farovon hayot» yo‘lini maqtashga o‘tib ketsa, hech hayron bo‘lmaslik kerak.

Bahodir Sharif
O‘zbekistonlik gazetxon tahallusi
Eltuz.com