Asosiy mavzular
22 mart 2019

Shantajni asosiy quroliga aylantirgan podpolkovnik

Ushbu maqola «Eltuz» muxbirining bir-birini tanimaydigan qator toshkentlik tadbirkorlar bilan suhbatlari asosida tayyorlandi.

Maqolada gap tadbirkorlarga ochiqcha tahdidlar qilib, ularni o‘marish yo‘liga o‘tgan ichki ishlar podpolkovnigi haqida boradi.

Bir-biridan alohida to‘rtta shaxsning iddaosiga ko‘ra, Toshkent shahri ichki ishlar boshqarmasi uyushgan jinoyatchilikka qarshi kurashish bo‘limi boshlig‘i Umid Qurbonov “profilaktik suhbat” bahonasida tadbirkorlarni ochiqchasiga o‘marishga o‘tgan.

Bosim ostida qolishlaridan qo‘rqib anonim tarzda suhbatlashgan tadbirkorlar «Eltuz» muxbiriga ichki ishlar podpolkovnigi Umid Qurbonov, asosan, o‘tmishda sudlangan tadbirkorlarni nishonga olayotganini iddao qilishdi.

Ularning so‘zlariga ko‘ra, Umid Qurbonov yanvar oyidan buyon go‘yoki jinoyatchilikning oldini olish maqsadida Karimov davrida sudlangan tadbirkorlarni “profilaktik suhbat”ga chaqirib, ulardan ochiqchasiga bir necha ming dollardan bir necha o‘n ming dollargacha pul ta'ma qilmoqda.

Tadbirkorlar bunday “profilaktik suhbatlar”da podpolkovnik doimo bir shaxs – prezident Mirziyoevning katta kuyovi Oybek Tursunovning akasi, Toshkent IIB boshlig‘ining o‘rinbosari Ulug‘bek Tursunov buyrug‘i bilan ish olib borayotganini pesh qiladi.

IIB otaliqqa olgan Toshkentning Shayxontohur tumanidagi «Komil avlod» nomli 412-maktabgacha ta'lim muassasasi

Tadbirkorlar bilan bo‘lgan suhbatlardan ma'lum bo‘lishicha, podpolkovnik tadbirkorlar bilan suhbatda odatda ikki bosim usulini qo‘llaydi:

1- usul: «Sening jinoiy to‘dalarga aloqang bor ekan. Qamalib ketishni istamasang, daromadingdan 20 foizini keltirib berasan. O‘shandagina senga hech kim tegmaydi. Sen Ulug‘bek Tursunov himoyasi ostida bo‘lasan»;

2-usul. «Sening jinoiy to‘dalarga aloqang bor ekan. Qamalib ketishni istamasang, IIB otaliqqa olgan bolalar bog‘chasini ta'mirlashga pul yoki qurilish mollarini keltirib berasan. O‘shandagina senga hech kim tegmaydi. Sen Ulug‘bek Tursunov himoyasi ostida bo‘lasan».

Tadbirkorlarga ko‘ra, mazkur usullarni Umid Qurbonov tungi klub va restoranlar egalari, do‘kondorlar va o‘rta ishlab chiqaruvchilarga nisbatan qo‘llamoqda.

“Karimov davrida mahkum robasi (kiyimi)ni kiygan tadbirkor qaytib u yerlarga borgisi kelmaydi. Umid Qurbonov bosimlaridan qutulish uchun bunday shartlarga rozi bo‘lyapmiz”, dedi ismi sir qolishini so‘ragan toshkentlik tadbirkor.

Boshqa bir tadbirkor esa Ulug‘bek Tursunovning bu ta'magirlikdan umuman bexabar bo‘lishi mumkinligini aytdi.

“Ulug‘bek Tursunov bunday ishlarga umuman aralashmaydi. Menimcha, Umid Qurbonov boshlig‘ining ismini sotyapti, xolos”, dedi u.

21 mart kuni «Eltuz» muxbiri bilan suhbatlashgan boshqa bir tadbirkor esa Umid Qurbonov ta'magirlikda yangi usulni qo‘llashga o‘tganini aytdi:

“Hozir tadbirkorlarni birma-bir chaqirib, 2 mingdan 20 ming dollargacha so‘ryapti. Nima emish – yangi kattaroq lavozimga o‘tayotgan emish”.

«Eltuz»ning izoh olish uchun Umid Qurbonov bilan bog‘lanish urinishlari natija bermadi.

Ayub Mingboev
Eltuz.com

Tag‘in o‘qing
4 may 2015
Shuhrat Bobojon Eltuz.com Bu partiya men orzu qilgan ikki maqsadni ko‘zlagan edi. Birinchisi Sovet Ittifoqidan butkul ajralib chiqib erkin ...
3 iyul 2016
Turkiya aeroportida 28 iyun kechasi uyushtirilgan bombali hujum paytida halok bo‘lgan namanganlik Abrorjon Ustaboev va toshkentlik Muxiddinov Samad Murodovichlar ...
16 fevral 2017
15 fevral kuni Shavkat Mirziyoevga videoshikoyat bilan murojaat qilgan toshkentlik tadbirkor Olim Sulaymonov qamoqqa olindi. Toshkent viloyatining Qibray tumanida ...
3 fevral 2020
Komil Allamjonov va Saida Mirziyoevaning OAV va blogerlarni qo‘llab-quvvatlash maqsadida tashkil etilgan yangi jamoat fondi vasiylik kengashi rahbarligiga tayinlanishi ...
Bloglar
3 yanvar 2023
Ulug‘ o‘zbek shoiri va muholifat lideri Muhammad Solih bilan suhbatning 20-qismida jurnalistning «Adabiyot nima?» degan ...
25 dekabr 2022
Ulug‘ o‘zbek shoiri va muholifat lideri Muhammad Solih bilan suhbatning 18-qismidan 90-yillarda taniqli adabiyotshunos Ibrohim ...
20 dekabr 2022
Ulug‘ o‘zbek shoiri va muholifat lideri Muhammad Solih suhbatning 17-qismi muxolifat va hokimiyatning kelajagi haqida ...