Document UZ
23 iyul 2018

Yirik tadbirkorga oid jinoyat ishidagi qing‘irliklar

Toshkent shahri IIBB narkotiklar tarqatish ishi bo‘yicha ayblanayotgan tadbirkor Jahongir Umarovga nisbatan qiynoqlar qo‘llanilgani haqidagi xabarlarni rad etdi.

IIBBning bayonotiga ko‘ra, 2018 yil boshlarida hibsga olingan J.Umarovning kabinetidan 10 gramm opiy moddasi topilgan. Hibsga olish chog‘ida uning tanasida gematoma va tirnalishlar bo‘lgan.

Jahongir Umarov “Integral Invest” kompaniyasi rahbari bo‘lib, Toshkentdagi yirik tadbirkorlardan biri hisoblanadi. Huquq himoyachilari uning jinoyat ishi biznesini tortib olish maqsadida soxtalashtirilganini ta'kidlamoqda.

Internetda jamoatchilikka taqdim etilgan, tadbirkor ishiga bevosita aloqador bo‘lgan audiyozuvlardan birida, huquq himoyachilarining iddaolarida jon borligi seziladi.

Audioyozuvda Toshkent shahri IIBB jinoyat qidiruv boshqarmasi o‘ta maxfiy ishlar bo‘yicha katta tezkor vakili Fathiddin Nuriddinov ekani aytilayotgan shaxs va Abdurashid ismli yigitning o‘zaro suhbati muhrlangan.

Ma'lum bo‘lishicha, tezkor vakil Abdurashidning qamoqqa tiqilgan tadbirkorga qarindoshligini bilmagan va shuning uchun mavzu bo‘yicha ochiq suhbat bo‘lgan.

Audiyozuvda gap J.Umarovni ushlash jarayoni yashirin kameraga olingani, jumladan, narkotiklar ham unga atayin tashlab qo‘yilgani ham tasvirga tushgani haqida so‘z yuritiladi.

Suhbat mazmunidan tezkor vakilning yashirin olingan videotasvirlar borligi to‘g‘risidagi xabarlardan tashvishga tushgani bilinadi. “(Qamoqqa olish jarayonida) u (J.Umarov) voqeani yozib oladigan sharoitda emas edi”, deydi tezkor vakil.

Qolaversa, audioyozuvda tadbirkorni qamoqqa tiqish buyurtma asosida bo‘lgani, buning uchun F.Nuriddinovga tadbirkor qamoqqa o‘tiradigan har bir oy uchun 10 ming dollar va'da qilinganiga ishora bor.

Umuman, tadbirkor ustidan o‘tkazilayotgan sud jarayonidagi boshqa dalillar va savol-javoblardan ham “bu yerda nimadir toza emas”, degan xulosaga kelish mumkin.

Xususan, J.Umarov va uning mehmonini hibsga olishda tezkor guruhga boshchilik qilgan tezkor xodim Azim Mahmudovning sudda bergan ko‘rsatmalari bunga misol bo‘la oladi.

Jumladan, uning bildirishicha, tezkor tadbir davomida opiy moddasi qo‘shilgani aytilayotgan choy idishlaridan barmoq izlari, gumonlanuvchilarning qon, siydik tahlillari, so‘laklaridan namuna olinmagan.

Tadbirda ekspertlar ham ishtirok etmagan. Tezkor tadbir jarayonining o‘zi ham tasvirga olinmagan. “Shoshib qoldik”, deb izohlagan o‘z ishiga bunday mas'uliyatsizlikni A.Mahmudov.

Garchi Toshkent shahri IIBB J.Umarovga nisbatan qiynoqlar qo‘llanilmagani haqida bayonot berayotgan bo‘lsa-da, ayblanuvchining yaqinlari shifoxonadagi ko‘rik xulosalari-yu sud tibbiy ekspertiza xulosalari ham Umarovga qiynoq qo‘llanilganini tasdiqlaganini aytmoqda.

Bundan tashqari, infarkt xuruji sababli sud zalidan shifoxonaga olib ketilgan J.Umarovda tekshiruvlar chog‘ida S virusli gepatit kasalligi aniqlangan.

Bu kasallikning yuqtirilishini esa tadbirkorning yaqinlari yana o‘sha katta tezkor xodim Fathiddin Nuriddinovdan gumon qilmoqda. Chunki u o‘z kabinetida J.Umarovga ukol qildirgan va oradan olti oy o‘tib tadbirkorda gepatitning xavfli ko‘rinishi aniqlangan.

O‘zbekistonda ichki ishlar xodimlarining qiynoqlar qo‘llashi taqiqlangan. Shuningdek, sudlarga qiynoqlar ostida olingan dalillarni qabul qilish ham qonun yo‘li bilan taqiqlangan.

Shunga qaramay, tadbirkor J.Umarov bilan sodir bo‘layotgan voqealar aslida huquq-tartibot va sud tizimida hammasi avvalgidek davom etayotganidan darak bermoqda.

Eltuz.com

Tag‘in o‘qing
30 aprel 2018
Shvetsiya poytaxti Ctokholm shahrining shimolida joylashgan Akalla mavzeida 30 aprel kuni terror akti rejalaganlikda gumon qilingan uch toshkentlik va ...
17 aprel 2018
Rossiyaning “Birinchi” telekanali O‘zbekiston hukumati bilan hamkorlikda mamlakat ichkarisida alohida telekanal ochmoqchi. Bu haqda Axborot va kommunikatsiyalar vazirligi matbuot ...
24 mart 2016
Xalq (to‘g‘rirog‘i, xalqqa mas'ullar) butun xayoli bayram bilan bo‘lib, g‘am-tashvishini unutdi go‘yo. “Hurriyat” gazetasi ham shu shodiyonlarga qanot bag‘ishlash ...
18 may 2020
Prezident Mirziyoev qizining eri, prezident xavfsizlik xizmati raisining birinchi o‘rinbosari Otabek Umarovning tug‘ilgan kuniga atab o‘zbek shou-biznesi va sport ...
Bloglar
2 mart 2021
Bir og‘aynim qo‘qqisdan men haqimda daholarcha bashorat qilib bunday deb qoldi: Kerak bo‘lsa, ming foiz ...
25 fevral 2021
Bolaligimda mendan 5-6 yosh katta qo‘shni kaptarvoz bola bo‘lardi. Ko‘pincha kaptarlari bizning hovlimizga uchib kelib ...
17 fevral 2021
Hali gazga o‘tilmagan yonilg‘i sifatida faqat benzindan foydalaniladigan vaqtlar edi. Benzin esa avtomobillarga yonilg‘i quyish ...