Asosiy mavzular
9 noyabr 2017

Bu ketishda tibbiyotni isloh qilib bo‘ladimi?

Ma'lum bo‘lishicha, o‘tgan yakshanba kuni Toshkentdagi bir qancha shifoxonayu poliklinikalar xodimlari Sergelida yangi qurilayotgan uylar oldini tozalash, ularni tartibga keltirish, chang-cho‘nglarini artish ishlariga safarbar qilingan.

Prezident to‘rtinchi bor mediklarni tanqid qildi. Rassom Tuz

Bunga sabab mazkur uylarning tez orada prezident ishtirokida foydalanishga topshirilishiga tayyorgarlik ko‘rishdir.

Yaqinda O‘zbekiston prezidenti, adashmasam, to‘rtinchi bor tibbiyot sohasidagi islohotlar bo‘yicha katta yig‘ilish o‘tkazdi.

Bu safar ham mazkur sohadagi kamchiliklarni ayamasdan tanqid qildi, qanchadan qancha rahbarlarni koyidi.

Hali hech bir soha bo‘yicha prezident buncha ko‘p va dam-badam majlis o‘tkazmagan bo‘lsa kerak. Shuning o‘ziyoq tibbiyotning bugungi holati qanchalik nochor ekanidan darak beradi.

Lekin o‘choqqa o‘tin tiqqan bilan uni yoqmasdan ovqat pishirib bo‘ladimi? Tibbiyotimizni “tiriltirish”ga urinishga qaratilgan sa'y-harakatlar ayni shu holatni esga soladi.

Endi mana shu fikrlarimizni isbotlashga harakat qilib ko‘ramiz.

Feysbuk sahifasidan skrinshot

Tibbiyot xodimlari o‘z ishlari qolib, yil davomida boshqa ishlarga jalb qilinadi. Ko‘chalarni tozalash kerakmi, o‘shalar (o‘qituvchilar bilan birga).

Feysbuk yuzeri Angelina Nazarova Sergelidagi qurilishlarni tozalashga tibbiyot xodimlaridan tashqari o‘qituvchilarning ham krepostnoy kabi tekin ishchi kuchi sifatida jalb qilinayotgani haqida yozdi. O‘qituvchilar qo‘pol munosabat sabab ishdan bosh tortishgach, maktab direktoriga hayfsan berilgan, o‘qituvchilarga esa 5000 so‘mdan yig‘ib berish buyurilgan.

Paxta terish kerakmi, birinchi navbatda yana tibbiyot xodimlari va o‘qituvchilar dalaga haydaladi. Biror katta ishga hasharchi kerakmi, marhamat, do‘xtirlar bor, o‘qituvchilar bor.

Paxta terimidagi “ko‘ngillilar” ham asosan shifokor va o‘qituvchilar. Rassom Tuz

Kuni-kecha “Kun.uz”da o‘qib qoldim. Endigina o‘qishni bitirgan yosh, intiluvchan tibbiy mutaxassis tumandagi poliklinikaga ishga kiribdi.

Ko‘p o‘tmay o‘zining shunday qobiliyati uchun bosh shifokor darajasiga yetishibdi.

Lekin oradan sal o‘tmay, do‘xtirlarini paxta terimiga safarbar etish haqidagi buyruqni bajara olmagani uchun ishdan bo‘shatilibdi.

Mana shunaqa gaplar bugun yurtimizda. Tibbiyot muassasalaridagi majburiy mehnat, poraxo‘rliklar, ta'magirliklar va boshqa illatlar haqida ko‘plab misollar keltirish mumkin.

Baraka topgurlar (Islom Karimov ko‘p ishlatardi bu so‘zlarni), tibbiyot xodimlarini o‘z holiga qo‘ymasdan, bevosita vazifasi bo‘lmagan har ishga jalb qilaversak, sohani isloh qilib bo‘ladimi, deydigan mard yo‘q.

Har qancha majlislar o‘tkazmaylik, sohadagi rahbarlarni har qancha almashtirmaylik, avvalo, mana shunday holatlarga barham bermasak, tibbiyotdagi islohotlar ko‘zlangan samarani bermasligi aniq.

Ha aytgancha, bu gaplar boshqa sohalarga ham taalluqli…

Sardor Azim
eltuz.com

Tag‘in o‘qing
27 mart 2017
Bahor dunyoning turli nuqtalarida turlicha keladi. Chunki bahorni hamma o‘zgacha talqin qiladi, o‘z bilganigacha ta'riflaydi. O‘zbekistonning bosma nashrlari ham ...
26 may 2020
Dissertatsiya qo‘lyozmasi toshqinda yaroqsiz holga kelganini iddao qilgan 28 yashar sirdaryolik Kamola Abrorxonovaga prezident topshirig‘i bilan doktorlik darajasi berildi. ...
26 dekabr 2016
Yer Oydan, Quyoshdan ajralib qolsa, u yo‘q bo‘lib ketadi. Buni bilish uchun astronom bo‘lish shart emas. Lekin O‘zbekiston misolida ...
29 sentyabr 2020
Davlat test markazi 25 sentyabr kuni e'lon qilgan natijalarga ko‘ra, ariza topshirgan salkam 1 yarim million abiturientdan 140 ming ...
Bloglar
20 oktyabr 2020
Bundan o‘n yil ilgari poytaxdagi o‘rtacha ikkita amaldor tushlikka bir millionga yaqin pul sarflashini eshitib ...
15 oktyabr 2020
O‘nta roman yozay, ellikta she'riy to‘plamim nashr etilsin, yozganlarim dunyoning barcha yirik tillariga tarjima qilinsin, ...
24 sentyabr 2020
So‘nggi paytlarda mendan endi migrantlarning taqdiri qanday bo‘lishi haqida tez-tez so‘rashmoqda. Ayrimlar Rossiyadan qaytayotgan ishsiz ...