Lukashenko jangari filmlar personaji kabi

Belarusdagi namoyishlar ortidan prezident Aleksandr Lukashenkoning 23 avgust kuni avtomat va bronejiletda aks etgan videosi ijtimoiy tarmoqlarda memga aylandi.

«Kecha Belarus hokimiyatini kuch bilan egallab olgan, o‘zini o‘zi prezident deya e'lon qilgan Aleksandr Lukashenkoning administratsiyasi oldiga minglab belaruslar norozilik bildirib to‘plandi. Lukashenko esa namoyishkorona tarzda qurol ko‘tarib chiqib, binoni o‘rab olgan OMONchilarni qo‘lladi. Bu bilan Lukashesku jinoiy tarzda egallab olgan hokimiyatini qurol bilan himoya qilishga tayyorligiga ishora qilmoqda.

Ertaga mamlakatda fuqarolik urushi boshlanib ketsa, eslab qoling, bu faqat miyasi aynib qolgan cholning aybi bilan bo‘ladi. Belaruslar qo‘llaridan kelgancha yumshoq tarzda qalbaki saylovni qayta o‘tkazishni talab qilishdi. Buni butun dunyo ko‘rdi. Boboy esa hali ham dunyo o‘zgarganini, odamlar o‘zgarganini tan ololmayapti. Boboy qaerdadir 90-yillarda, tsivilizatsiyadan uzoqda bo‘lgan bo‘rdoqichilik kolxozida qolib ketgan.

Kechagi qurol ko‘tarib chiqqan holati esa «Taksi» filmida komissar rolini o‘ynagan Bernar Farsini eslatmoqda», deya izohladi bu holni bloger Nozim Safari.

Eltuz.com