Turkiya jannat va jahannam orasida

Turkiya Prezidenti Rajab Toyib Erdo‘g‘on kamida 34 kishining umriga nuqta qo‘ygan Anqara portlashlaridan so‘ng «terrorizmni tiz cho‘ktirish»ga va'da bergan bo‘lsada mamlakat beqarorligicha qolmoqda.

O‘tgan oyda Anqarada harbiy karvonga hujum oqibatida 28 kishi halok bo‘lgan edi.

Bir tarafdan PKK terrorchi guruhi jangarilari ikkinchi tarafdan mamalakatga milliondan ziyod qochqinlar bilan birga Suriyadan kelgan ko‘rinmas IShID qo‘poruvchilari vaziyat tarangligini ta'minlamoqda.

Ikki saylov o‘tgan keyingi olti oy ichida Anqarada amalga oshirilgan uch hujum Turkiyani boshqarayotgan Adolat va taraqqiyot partiyasining siyosiy xatosi uchun to‘lov sifatida ko‘rinmoqda.

Kurort mavsumi oldidan rus sayyoxlaridan mosuvo bo‘lgan o‘rta yer dengizi oromgoxlarida esa yuz minglab suriyalik qochqinlar muvaqqat qo‘nim topgan.

Dengiz soxilidagi Silifka mavzeida suriyalik qochqin bolalar nargiz gullarini sotib yurishibdi.

Yo‘l bo‘yidagi belgida esa bu yerning nomi jannat ekani yozilgan. Sal narida esa jahannam degan joy bor ekan. Jannat va jahannam deb yozilgan lavh osilgan yo‘ldan 60 kilometr naridagi Suriyada esa janglar bormoqda.

Nargiz gullarini sotib yurgan Halablik bola uchun Suriya jahannam timsoli. «Suriya jahannam», deydi Rashid ismi bu 12 yashar bola.

Rashid nargiz gullarini sotgan pulini onasiga oborib berishini aytadi:

«Onam qayiqchiga pul berib dengiz orqali bizni yevropaga jo‘natmoqchi. Men Suriyada jahannamni ko‘rdim, lekin Turkiya ham jannat emas ekan. Onamning aytishicha jannat Germaniyada» deydi beqaror bo‘lgani tezroq tark etish orzusida bo‘lgan Rashid.

Abdujamil Do‘stmuhammad
Eltuz.com