Kundalik
5 yanvar 2016

O‘ktam Pardaevga qamoq tahdidi, go‘daklarga moliyaviy bosim

Jizzax viloyati huquq-tartibot idoralari xodimlari asossiz, uydirma ayblovlar bilan qamoqda qolayotgan huquqbon O‘ktam Pardaevning oila a'zolariga Yangi yil “sovg‘a”si hozirladi.

Bu safar ularning nishoni huquq himoyachisini ruhan qo‘llab-quvvatlayotgan oila a'zolari bo‘ldi. Davlat idoralari huquqbonning yaqinlariga ko‘p yillik tajribalarda toblangan, ancha samarali usul – moliyaviy bosim qo‘lladi.

Yangi yil kunlarida prokuratura, gaz idorasi, mahalla, ichki ishlar xodimlari, posbonlar, qariyb o‘nga yaqin kishi O‘.Pardaevning, ukalari Sharof va O‘tkir, singlisi Mohiraning xonadonlariga qo‘qqisdan bostirib bordi.

“O‘ktam akamning ayoli kechki payt uyda yolg‘iz bo‘lgani sababli chaqirilmagan mehmonlarga darvozani ochmagan. Kelganlar o‘zini prokuraturadanmiz, deb tanishtiribdi. “Gazdan katta miqdorda qarzingiz bor, toki to‘lamas ekansiz, gazni uzib ketishimiz kerak”, deya dag‘dag‘a qilgan”,- deydi Sharof Pardaev.

Darvoza ochilavermagach, ortiga qaytishga majbur bo‘lgan bu guruh mazkur harakat bilan kifoyalanmadi.

2016 yil 4 yanvar kuni ular O‘ktam Pardaevning uyiga kirishga muvaffaq bo‘ldi va “gazdan 400 ming so‘mdan ortiq qarzi borligi” bahonasida gaz quvurlarini uzib ketdi. Natijada huquqbonning ayoli va uch norasida bolasi qishning qahraton kunlarida gazsiz qoldi.

“Akam, bilasiz, qamoqda. Yangam uchta yosh go‘dagi bilan qolgan. Eng kichigi 2 yoshda. Kattasi 6 da. Endi ularning holi nima kechadi qishning sovuq kunlarida?” – deya tashvish bildirdi Sh.Pardaev.

Prokuratura boshchiligidagi “gvardiya” huquqbonning singlisi Mohira Pardaevning gardaniga ham gaz iste'moli uchun yo‘q joydan million-million qarzdorlik “ilib” qo‘ydi. Ammo to‘lov qog‘ozlarini gaz idorasiga ko‘tarib borgan M.Pardaeva ularning moliyaviy bosimidan qutulib qolishga muvaffaq bo‘ldi.

Biroq jizzaxlik qonun qo‘riqchilarining g‘azabidan omon qolish O‘ktamning ukasi O‘tkir Pardaevga nasib etmadi. Unga 2 350 ming so‘m qarzdorlik e'lon qilinib, xonadoni tabiiy gazdan uzib qo‘yildi.

“O‘zi gaz miltirab turardi. Shuni ham ko‘p ko‘rishdi. Har holda ovqat pishib, choy qaynab turgandi… Bizda issiqxona bo‘lmasa, salkam ikki yarim million so‘m qarzdorlik qaerdan bo‘lsin? Qasddan, atayin bo‘ynimizga qarzdorlik ilindi… Men barcha qo‘shnilarimdan so‘rab chiqdim. Hech birining uyiga gaz idorasidan, prokuraturadan, militsiyadan guruh kelmagan, qarzdorlik yozilmagan, gazi ham uzilmagan. Bu “to‘y” yolg‘iz bizning boshimizga kelgan ekan. Hammasi O‘ktamjonning faoliyati orqasidan bo‘lyapti. Men kenja o‘g‘lim O‘tkir bilan yashayman. Oilada 6 jonmiz. O‘tkirjonning ham 3 yosh bolasi bor. Barchasi hali go‘dak: 2 yosh, 5-6 yosh. Yosh bolalar bilan kelinim endi qishning sovug‘ida gazsiz qanday kun kechiradi?” – deya o‘rtanadi huquq faolining onasi Nasiba opa.

Yaqindagina 2016 yilni “Sog‘lom ona va bola yili” deb e'lon qilgan O‘zbekiston prezidenti: “Sog‘lom ona sog‘lom bola degani, sog‘lom bola tinch-totuv, to‘kin hayot, baxtli oila degani, oila baxtli bo‘lsa, jamiyat mustahkam bo‘ladi”, deya kuyib-pishganida bu yo‘ldagi urinishlar qishda gaz ta'minotini uzish bilan boshlanishini nazarda tutganmikin yo, deb o‘ylab qolasan kishi.

Nima bo‘lganda ham, O‘ktam Pardaevga qamoq jazosi bilan tahdid qilayotgan huquq-tartibot idoralari endi nafaqat uning o‘zini, balki butun oila a'zolarini, yaqinlarini moddiy va ruhiy jihatdan to‘la sindirishga bel bog‘lagan ko‘rinadi.

Malohat Eshonqulova
mustaqil jurnalist, huquq faoli
Eltuz.com

Tag‘in o‘qing
24 avgust 2020
Fayzulla Ubaydullo Xo‘ja o‘g‘li, ya'ni Fayzulla Xo‘jaev 1896 yil 15 martda Buxoro amirligida tug‘iladi. Otasi Ubaydullo Xo‘ja Buxoro amirligidagi ...
3 avgust 2020
O‘zbekistonning jamoatchilik bilan aloqalar bo‘yicha yangi kampaniyasi diqqat markazi mamlakatning paxtachilik sanoatini xalqaro boykot qilishga qarshi kurashishga qaratilgan, deya ...
23 noyabr 2015
Bugun, 22 noyabr soat 10 da, Shved shahri Estersundda 1978 yilda tug‘ilgan O‘zbekiston fuqarosi Yuriy Jukovskiy ustidan sud boshlandi. ...
1 avgust 2018
Vazirlar Mahkamasining 2016 yil 5 fevraldagi qaroriga asosan, Sog‘liqni saqlash vazirligi tizimidagi statsionar davolanish va profilaktika muassasalarida ovqatlanishni tashkil ...
Bloglar
18 yanvar 2021
Bor ekanda yo‘q ekan, och ekanda to‘q ekan, yaqin-yaqin zamonlarda yot bosqinchilarning yuz yildan ko‘proq ...
13 yanvar 2021
Kun.uz professionallarni ishga qabul qilar emish. Katta maosh, ikki mahal ovqat. Sihatgohning o‘zi-ya! Bunday ishxonani ...
11 yanvar 2021
Taniqli shoir Bahrom Ro‘zimuhammad 60 yoshda Bahrom aka indamaygina oltmishga kiribdi. Botinan qaralganda, unday emas. ...